EDITORIAL: Panaglusulos ni Vice President Leni Robredo a Kameng ti Gabinete

MASAYANGAN dagiti adu a Pilipino iti kellaat a panaglusulos ni Vice President Maria Leonore Robredo kas chairperson ti Housing and Urban Development Coordinating Council ken kameng ti Gabinete ni Presidente Rodrigo Duterte ta kas maikadua a kangatuan nga opisial ti Pilipinas ket awan unayen ti nadagsen nga akem ken responsibilidadna kabayatan ti kaaddana iti turay.

Naglusulos ni Robredo kas HUDCC chairperson kalpasan a nabagaan a saanen a padar-ayen ti Presidente nga agatender iti cabinet meeting gapu iti rason nga “irreconcilable differences” wenno adu a pagdumaanda iti prinsipio ken pagtaktakderan kadagiti gannuat ken programa ti agdama nga administrasion.

Saanen a nakaskasdaaw ti panaglusulos ni Robredo a kameng ti gabinete ni Duterte ta naggiddiat dagiti partido a nakaikappenganda a kangrunaan a nagsalisal idi napalabas nga eleksion. Kameng ni Robredo iti Liberal Party, ni met Duterte ket Partido Demokratiko ng Pilipinas – Lakas ng Bayan.

Maipalagip nga idi naiproklamaren a nangabak a Presidente ni Duterte ket inrakuraknan a saanna nga ikkan ni Robredo iti posision iti gabinetena ta kalaksidan a saanda nga agkapartiduan ket saanna a kayat nga agsakit ti nakem kenkuana ni sigud a Senador. Ferdinand Marcos Jr. nga inabak ni Robredo iti agarup 300,000 a botos, ken nagprotesta ni Marcos iti Presidential Election Tribunal.

Maipalagip a nagsina pay iti inagurasion ti Presidente ken Bise Presidente idi Hunio 30, 2016. Nagsapata ni Duterte sadiay Malacañang Palace, ni met Robredo ket nagsapata iti baro nga Opisina ti Bise Presidente sadiay Quezon City. Immuna a nagsarak da Duterte ken Robredo iti pannakaisaad iti akem kas Chief of Staff ti Armed Forces of the Philippines idi ni General Ricardo Visaya a nagretiron itay napalabas a lawas. Kalpasan dayta a pasken ken panag-courtesy call ni Robredo ken ni Duterte sadiay Malacañang ket indiaya ti Presidente ti akem kas HUDCC chairperson nga inawat met ti Bise Presidente.

Iti un-una ti lima a bulan a kaadda ni Robredo iti Gabinete ket awan ti nadlaw ti publiko a rekka ti relasion dagiti dua a kangatuan a lider ti pagilian iti laksid dagiti naggidiatanda iti partido ken dagiti pagtaktakderanda kadagiti gannuat ti Presidente.

Saan a kanunongan ni Robredo ti wagas ti administrasion a mangparmek ti panagraira ti illegal a droga kas dagiti mapaspamak a panaglabsing ti human rights dagiti suspek a drug users ken pushers kas ti extra judicial killings wenno summary executions. Kontra pay ni Robredo iti plano a pannakaisubli ti susa a patay para kadagiti nadagsen a krimen, ken pannakaipababa ti tawen dagiti menor de edad a maaddaan iti criminal liability. Sinupiat pay ni Robredo ti saan a naindiplomasiaan a trato ti Presidente iti United States, Europian Union ken United Nations gapu iti panangkritikar dagiti liderda kadagiti mapaspasamak a human rights violations iti pagilian.

Krinitikar pay ni Robredo a saan a maitutop ken maikontra kadakuada a babbai ti naka-televise nga angaw ni Duterte a panangkitkitana iti tumengna kabayatan dagiti cabinet meetings iti anibersario ti iduduprak ni Bagyo Yolanda. Binabalawna pay ti pannakaipalubos ti pannakaitabon iti Libingan ng mga Bayani iti bangkay ni sigud a Presidente Ferdinand Marcos gapu kadagiti pannakaabusar ti human rights bayat ti Martial Law.

Ibilang dagiti napudno a kameng ti LP ken dagiti pasurot ni Robredo a nasayaat ti panaglusulosna tapno nawaya isuna nga agtimek ken mangkontra kadagiti saan a nasayaat a gannuat ti administrasion. Ngem masayangan dagiti umili ta no agpatingga laengen a kasla reserba a pilid ti Bise Presidente ket saanna a naan-anay a mausar ti kabaelanna a tumulong iti pannakapasayaat ti kasasaad dagiti napanglaw nga awanan pay ti bukod a pagtaengan. Sayang ti kabaelanna, pondo ken panawen a kaaddana koma iti administrasion iti las-ud ti innem a tawen a terminoda. Maibilang ni Robredo kadagiti talaga a makabael a kameng ti gabinete.

Iti panagkameng ken panagtalinaed iti gabinete ti Presidente ket agdepender iti pangngeddeng ti Chief Executive. Adda iti Presidente ti desision no sino ti kayatna nga agkameng wenno agtalinaed iti gabinetena ket responsibilidad ken sungsungbatanna kadagiti umili ti aramid wenno gapuananda.

Aginnemen a bulan ti agdama nga administrasion ken dagiti kameng ti Gabinete ni Duterte. Mapaliiwen no sino kadakuada dagiti talaga a makabael a makaipaay iti napudno a serbisio.