EDITORIAL: Panagpalutpot iti double insertion, addaan kolor politika

Uray ania ti ibagbaga dagiti senador, adda latta suspetsa nga adda kolor-politika ti maisaysayangkat a panagpalutpot iti Senado mainaig ti double insertion a mapapati a nakaisangkotan ni dati a Senate President Manny Villar.

Dakamatentayo ditoy a mapapati a dua ti apropriasion para iti maymaysa a proyekto ti kalsada ta agpada a nailatanganda iti P200 milion iti General Appropriations Acts ti 2008 ken 2009.

Daytoy ti maaw-awagan iti C-5 Road wenno Carlos P. Garcia Avenue Extension. Daytoy a kalsada ti mamagkamang ti North Luzon Expressway (NLEX) iti SLEX ken iti Coastal Road iti Las Pinas.

Naisangkot ni Villar iti kontrobersia gapu iti mapapati a kaadda iti dagana iti pagdalanan ti nasao a proyekto.

Saantayon a sukimaten no adda merito wenno awan ti kaso a maikontra ken ni Villar. No adda dagiti ebidensia maikontra kenkuana, rebbengna laeng a sumango iti panagpalutpot tapno dalusanna ti naganna.

Ngem saan a maikkat ti suspetsa a nairusat ti panagpalutpot ken ni Villar gapu ta imbatadnan ti panagkandidatona para presidente iti eleksion inton 2010. Adda pagbatayan ti suspetsa ta maysa met nga agngayangay para iti kangatuan a puesto ti pagilian ti dadaulo ti komite a mangpalutpot kenkuana.

Saan ngarud a mapabasol ni Villar iti panangipakpakaunanan a kedngan ti komite a nakabasol iti alegasion maikontra kenkuana uray iti baet ti panangipetteng ni Sen. Panfilo Lacson, dadaulo ti komite a mangpalutpot iti kontrobersia, a patas ti panagdengngeg nga isayangkat ti komitena.

Ngem uray ni Sen. Myriam Defensor-Santiago, mamati nga iti panagbubutos kalpasan ti panagdengngeg, maabak la ketdi ni Villar agsipud ta mabingayto iti dua dagiti kameng ti komite: iti majority ken iti minority.

Adda kinaagpayso daytoy nga imbatad ni Sen. Santiago ta iti kallabes, nakitatayo no kasano ti panagtakder dagiti madaydayaw nga agilinlintegtayo kadagiti complaint wenno kontrobersia a nakaisangkotan ti kaaliado wenno kapartiduanda.

Kadagiti supporters ni Villar, ipukkawda la ketdi a demolition job ti ar-aramiden ni Lacson ken ni Villar tapno bumaba ti rating daytoy ken mapukaw ti maysa a nainget a kasangona iti kinapresidente iti 2010.

Iti daytoy a situasion, kasano ngarud a patien ti publiko nga awan marisna a politika ti panagpalutpot no makedngan nga agpayso ni Villar a nakabasol babaen ti butos dagiti saanna a kaaliado iti Senado?

Tapno mapukaw ti aniaman nga ulep a mangkumot iti nasao a panagpalutpot, ag-inhibit koma amin dagiti nangibataden iti tarigagayda nga agkandidato para iti kinapresidente iti masungad nga eleksion.

Kredibilidad ti Senado ti nakataya iti daytoy a panagpalutpot. Aniaman ti lumtuad a resultana, addanto latta dagiti di mapnek ken di mapagustuan.#