EDITORIAL: Panangabak ti Pilipinas iti Olympic Games

NAPALAUS ti  ragsak dagiti Pilipino ti pannakagun-od iti silver medal iti 2016 Rio de Janeiro Olympic Games ni Hidilyn Diaz ta 20 a tawen ti napalabas kalpasan daydi naudi a panangabak ti medalia ti pagilian.

Nangabak ni Diaz, iti benneg ti female weightlifting babaen ti panangawitna ti barbel nga agdagsen iti 53 a kilo. Nangabak met ti gold medal iti dayta a division ti atleta ti Chinese Taipei, ken bronze medal met ti South Korea.  Agtawen ni Diaz iti 25, kameng ti Philippine Air Force ken tubo ti napanglaw a pamilia sadiay Zamboanga City. Dayta ti maikatlon a gundawayna a makisalip iti Olympics. Nakisalipen sadiay Beijing idi 2008 ken idiay London idi 2012 iti 58 kilograms division. Umawat ni Diaz iti five million pesos a gunggona iti nasional a gobierno, balay ken lote manipud iti pribado a sector, ken dadduma pay nga insentibo. (Sabali pay ti P2 million nga ited ni Pres. Duterte, ken P500,000.00 manipud iti gobierno ti Zamboanga.  Ed)

Immuna a nakisalip ti Pilipinas iti Olympics sadiay Amsterdan idi 1924 babaen ti kakaisuna nga atleta a ni David Nepomuceno. Umuna a nakagun-od ti Pilipinas iti Olympic medal (bronze) idi 1928 babaen ken ni Teofilo Yldefonso iti swimming, 200-meter breast stroke. Nangabak manen ti pagilian iti tallo a bronze medal idi 1932 sadiay Los Angeles, maysa a bronze medal idi 1936 sadiay Berlin, West Germany.

Idi 1964 sadiay Tokyo, Japan, nangabak ti silver medal ni Anthony Villanueva iti boxing. Nagun-od met ni Leopoldo Serrantes ti bronze medal iti boxing sadiay Seoul, Korea idi 1988. Nangabak met iti bronze medal ni Roel Velasco sadiay Barcelona, Spain idi 1992. Nangabak ti silver medal ni Mansueto “Onyok” Velasco, sigud a kameng ti Philippine Navy, iti boxing idi 1996 Atlanta Olympics, USA. Nangabak pay dagiti Pilipino nga atleta kadagiti gold, silver and bronze medals iti 2008 Beijing Olympics kadagiti demonstration sports ngem saan a maibilang a regular events.

Adu dagiti saan a nangipagarup a ti panangabak manen iti medalia ti Pilipinas iti kaudian nga Olympic Games ket maysa a babae ken iti weightlifting a saan a nalatak nga ay-ayam kadagiti Pilipino ken saan a maipangpangruna a supsuportaran ti gobierno ken dagiti sports benefactors.

Iti panangabak ni Diaz iti Olympics ket nangipaay ti adal ken pagpampanunotan ti gobierno ken dagiti stakeholders iti sports iti pagilian a nasken ti pannakarepaso dagiti programa iti paay-ayam tapno makapataud kadagiti mangabakto manen iti Olympic Games ken dadduma pay nga international competition. Kasapulan ti pannakaipangruna a suportaran dagiti sports nga adda dakkel a namnama dagiti Pilipino a mangabak kadagiti international tournament kas ti weighlifting, boxing, archery ken dadduma pay nga ay-ayam a saan unay a nasken ti pisikal wenno kasapulan ti dakkel ti bagi ken adu unay a pondo.

Saan koma a maipangpangruna dagiti nalatak a team sports kas ti basketball ken football a kasapulan pay nga agala kadagiti matangdanan a ganggannaet tapno pumigsa dagiti team ti Pilipinas. Maipangpangruna a maik-ikkan ti importansia ken suporta dagiti player ti team iti basketball ken football a makisalsalisal kadagiti internasional a torneo.  Adu dagiti kameng dagiti national team iti basketball ken football ti naturalized a Pilipino wenno saan a natural nga umili iti Pilipinas dagiti masupsuportaran. Ngem dagitoy a team ket saan pay a nangabak a makisalip iti Olympic ta naabakdan kadagiti qualifying games.

Nagasat dagiti atleta a kas kada Diaz ken Velasco iti panangabakda iti medalia iti Olympic Games. Nasuerteda ta kamengda ti military ken adda regular a sueldo ken suporta ti gobierno kabayatan ti panagsanayda. Nagsayaat koman no kasta amin ti pannakasaranay dagiti atleta ti pagilian tapno matarakenda ken makagun-odda ti medalia kadagiti internasional a pasalip. Aywanan koma a nasayaat ti gobierno dagiti ubbing nga atleta ta bareng mangabakto metten ti Pilipinas iti balitok a medalia iti regular event iti Olympic Games. (Eden A. Alviar)