EDITORIAL: Panangibiag ti kaipapanan ti Umuna a Paskua

BISPERAS ita ti kaaldawan ti Paskua a panangrambak dagiti Kristiano iti pannakayanak ni Apo Jesus, iti tengnga ti rabii, nasuroken a dua ribu a tawenen ti napalabas sadiay Betlehem tapno ispalenna dagiti tattao iti basol.

Iti sango dagiti nagduduma a panagrambak iti Pilipinas a mabigbig a kangrunaan a pagilian dagiti Kristiano Katoliko iti Asia, napateg a lagipen dagiti pasamak kabayatan ti Umuna a Paskua idi impasngay ni Birhen Maria ni Niño Jesus nga anak ti Dios a timmao babaen ti bileg ti Espiritu Santo.

No man pay Anak ti Dios, nayanak ni Apo Jesus a napnuan-kinapakumbaba iti nanumo a kulloong iti rukib iti sidong dagiti karnero gapu ta awan ti nangpasangbay kadagiti nagannak kenkuana a da Maria ken Jose iti panagdaliasatda. Naipasngay ni Jesus ken ni Maria a nagtaud iti napanglaw ngem nataknen a pamilia, ken asawa ni Jose a karpintero. Dagiti met pastor nga agbambantay kadagiti karnero dagiti immuna a bimmisita iti Maladaga a Mesias sakbay dagiti tallo a mago wenno masirib a naggapu iti Daya a nangisangpet kadagiti napateg a sagutda.

Iti panagtulid ti panawen, in-inuten ti panagbaliw ti wagas ti panagbiag, manipud daydi pannakaipasngay ni Apo Jesus iti Umuna a Paskua agingga iti panagtutuok ken ipapatayna iti Krus iti Umuna a Semana Santa gapu ti panangikasabana iti Naimbag a Damag ken Pagarian ti Dios.

Kakibin ti panaglabas dagiti tawen ti panagbalbaliw ti kita ti panagbiag dagiti tattao iti sangalubongan. Iti tinawen a panangrambak ti Paskua ket nagbaliwen ti panangselebrar iti daytoy nga aldaw a naisentron kadagiti nailubongan a pasken. Nagaburanen ti nauneg a kaipapanan ti Paskua gapu ti panagbalbaliw ti ugali, galad ken kananakem dagiti tattao a nagpaadipenen iti kinamaterialismo ken kinakomersialismo iti wagas ti panagrambak.  Gapu ti kinamaterialismo dagiti tattaao, nagbalinen ti Paskua a rason ti pannakaitandudo dagiti adu a negosio tapno agganansia iti adu dagiti nagduduma a komersio.

Nasimple ken nanumo ti wagas ti panagbiag ni Apo Jesus manipud pannakaipasngayna iti kulluong agingga iti ipupusayna iti krus, ngem kasupadi ti wagas a panagrambak a kayat dagiti kaaduan a tattao iti Panawen ti Paskua a kurangen ti panagselebrar ken panagragsak no awan dagiti nawadwad a kuarta, adu a taraon, mainum,  regalo ken dadduma pay a material a banag.

Mayannatup kadi pay iti espiritu iti Umuna a Paskua a kinasimple, panagiinnayat, panagbibinnuray ken panagkakappia dagiti kaaduan a wagas ti panagrambak iti daytoy a panawen? Masurot kadi dagiti babaknang a negosiante ken lider ti pammati ken gobierno ti pammatulad ni Apo Jesus a nagbiag a nasimple, managayat, managparabur ken kas napakumbaba ken napudno nga Adipen-Pangulo?

Dandanin ti maika-500 a tawen ti Kristianismo – Katolisismo iti Pilipinas manipud idi nadiskobre ni Ferdinand Magellan idi 1521 ken insangpet dagiti misionero a Kastila ti bukel ti pammati iti pagilian. Nagtalinaed ti Katolisismo ti kangrunaan a pammati dagiti Pilipino agingga iti agdama a tiempo iti laksid dagiti adu a karit ken tubeng ti pannakaisaknapna.

Iti kadagupan dagiti 105 Million a papulasion ti Pilipinas, 80 a porsiento dagiti Kristiano, ken 80 met a porsiento kadagiti Kristiano ket Katoliko. Saan a mailibak a Katoliko dagiti kaaduan a lider ti gobierno. Ngem nakalkaldaang nga uray ita a panawen ti panagiinnayat ken kappia ket saan nga agsardeng dagiti adu a krimen, dagiti kurapsion a pakainainagan dagiti agpapaay iti gobierno. Agtultuloy ti panagbasbassawang ti Presidente kadagiti lider ti Iglesia Katolika, ken panangin-insultona iti Dios dagiti Katoliko.

Agtultuloy dagiti pammapatay a mangipaneknek iti saanen a pannakaraem ti kinasagrado ti biag a sagut ti Dios. Saan latta nga agpatingga ti negosio nga illegal a droga uray rinibun dagiti nakettel a biag; ken ti nakalkaldaang unay ket adda dagiti nangato nga opisial ti gobierno a mainanaig iti daytoy nga illegal a negosio a mangdaddadael iti biag ken masakbayan dagiti Pilipino nangruna dagiti agtutubo.

Awan-sarday met dagiti ranget iti nagbaetan ti tropa ti gobierno ken dagiti rebelde a komunista uray iti panawen ti Paskua. Agtultuloy ti pangta ti terorismo ken riribuk sadiay Mindanao a gapu ti nangkiddawan ti Presidente iti Kongreso ti pannakayalud-od ti Martial Law iti dayta a paset ti Pilipinas tapno magun-od ti mataginayon a kappia.

Nakalkaldaang dagiti pagteng iti Pilipinas a pagilian dagiti kaaduan a Kristiano nga uray iti tiempo ti Paskua ket adu dagiti dakes nga aramid dagiti opisial ti gobierno ken pribado a tattao a maikontra kadagiti bilin ken pagayatan ti Dios.

Ita a panawen ti Paskua, lagipen ken ibiag koma dagiti Pilipino nangruna dagiti Kristiano ti pammatulad ni Apo Jesus, ken ti kaipapanan ti pannakaipasngay ti Mesias tapno magun-od ti ayat, kappia ken biag a nagin-awa iti Pilipinas. #