Footer

EDITORIAL: Panawenen a bumingaytayo iti Cruise Ship Tourism

Dakkel ti posibilidad ti panagsantak ti Cruise Ship Tourism iti Amianan ta iti panagsangpet dagiti nalalatak a cruise ships iti pagilian, mairaman latta a mataldiapan ti Region I.  Mangipamatmat ti kinaadda iti nabungkong a bulsa wenno nakananama a market ti turismo. Daytoy ita ti maysa a mangitagtag-ay iti industria ti turismo iti rehion babaen ti naisangsangayan a karisma ti Hundred Islands ti Alaminos City a masansan a karaman a pagpallailangan dagiti turista a nakalugan iti cruise ships. Ngamin, no simmanglad dagitoy iti Subic Bay Freeport mataldiapan latta daytoy a tourist attraction.

Ngem saan pay laeng a pumalagapag ti potensial daytoy. Saan a madlawan wenno mairanud dagiti dadduma a probinsia iti amianan. Iti nadagdagsen a panangiladawan, matmaturogda iti pansitan.

Ti kinaawan ti puerto wenno sangladan dagiti cruise ships ti makitkitami a rason iti saan a pannakairaman a mataldiap dagiti probinsia iti Amianan nupay naparaburan dagitoy kadagiti pagpallailangan. Iti agdama, agpannuray laeng dagitoy a cruising ships iti Subic Bay Freeport idiay Zambales, Port Currimao iti Ilocos Norte ken Sta. Ana Port Irene iti Cagayan.

Ti kinaawan dagiti seaport ti maysa a lapped ti  panagtayok iti benneg ti turismo kadagiti probinsia iti Amianan. Nangruna la unay dagiti pagsangladan dagiti dadakkel a recreational ken tourist vessels. Kas itay laeng nabiit, sumagmamano  a cruise ships ti nagsangpet iti pagilian a nagkarga kadagiti turista a maganatan a mangimatang iti nalatak a Feast of the Nazarene.

Ket masaludsod: sumingsingising pay laeng ken di pay nakariing iti panagur-urokna ti religious tourism ti pagilian?

Iti daytoy a benneg ti industria, nasisita la unay dagiti cruising port  tapno ad-adda pay a maipursigi ti imatang ken mangsallabay iti essem dagiti turista nga agpallailang iti pagilian. Ngamin, iti cruising port ti pakaiparangan ti narangrang nga entertainment, dagiti naidumduma a cultural facets, karamanen dagiti  dining areas, souvenir shops, art galleries, interactive museums, a kaay-ayo la unay nga iyawis ti cruise ship tourism.

Dakkel ti potensial a pamastrekan daytoy nga industria no la ket makaguyugoy kadagiti turista dagiti maiparang  a pagpannakkel a buya, cultural traditions, festivals, religious events, ken kangrunaanna la unay ti pannaka-upgrade dagiti nagdumaduma nga existing ports.

Kasano kadakkel ti ilgapen ti Amianan itoy  pagraranudan nga imbag?  Agtignay koma ngarud ti probinsiatayo nga Ilocos Sur a makiraman iti bingay ken ilgat nga iparabur ti cruise ship tourism.  (J.M.Agpalo, Jr.)