EDITORIAL: Panawenen a timbangen ni Pacquiao ti turongenna kalpasan ti boksing

Bayat a maisursurat daytoy, bigat ti Domingo, Nobiembre 23, (9 p.m, Nobiembre 23 sadiay Macau a nakaangayan iti boksing), naruayen dagiti tattao nga agur-uray it ruar ti Vigan City Convention Center para iti panagbuyada iti pannakiboksing ni Manny Pacquiao ken ni Chris Algieri.

Daytoy ti maikatlo a daras a pannakiboksing ni Pacquiao manipud idi pinaturog ni Manuel Marquez iti maikapat a panagrupakda. Ngem kasungani iti padto dagiti boxing authorities a dakkel ti epektona iti malalaki a boksingero a Filipino iti pannaka-knockoutna, makuna a makapnek ti ibabangonna kalpasan a nangabak iti dua a maudi a pannakiboksingna.

Iti daytoy a pannakirupakna ken ni Algieri, kitkitaen ti kampo ni Pacquiao a tumbaen ti Filipino champion ni Algieri babaen iti knockout tapno mapukaw a maminpinsan ti mantsa ti pannakaturogna iti ima ni Marquez, tapno maminsan pay a maipatalgedna a nagsublin ti killer instinct a nangitag-ay kenkuana kadagiti kallabes a pannakiboksingna.

Ngem saan a pipitsugin ni Algieri. Impresibo met ti panangabakna ken ni Roslan Provodnikov a naudi a kinaboksingna ken nangsemento iti daytoy a panagrupakda ken ni Pacquiao.

Ita pay, bayat ti promosion ti Pacquiao-Algieri fight, ipalpalagid manen ni Bob Arum ti posible a pannakatungpalen ti tartarigagayan dagiti minilion nga apisionado ti boksing a panagrupak da Pacquiao ken ni Mayweather iti ring tapno maammuanen no asino ti taltalaga a pound-for-pound king kadakuada a dua.

Ngem mamatikami a no di pay mapasamak daytoy a pagteng iti tay-ak ti boksing inton 2015, nasaysayaat laengen nga isab-it ni Pacquiao ti glovesna ket sanguennan dagiti negosiona, nangruna iti politika no sadino a maysa nga agilinlinteg iti Kamara.

Kadakami, awanen ti sabali pay a kayat a paneknekan ni Pacquiao. Isu ti kalaingan a boksingero a napatanor ti Filipinas, ken maibilang a kalaingan iti internasional a boksing.

Iti pattapattami, iti las-ud ti sangagasut a tawen, awanto pay ti boksingero a makapatar iti nagun-od ni Pacquiao, ti panagkampeonna iti walo a dibision iti boksing.

Uray ni Mayweather, posible a daytoy a rekordna ti mangtiptiped kenkuana a makiboksing ken ni Pacquiao. Dakkel ti respetona ken dakkel ti amakna a makirinnupak iti ring iti idolotayo a boksingero gapu iti daytoy a rekord ni Pacquiao a mabalin a mangmantsa iti awan pay pannakaabakna a rekordna.

Ala, rumbeng nga amirisen a nalaing ni Pacquiao no adda pay kenkuana ti dati a pardas iti ima ken dapan, ti siglat nga aglisi, ken iti kaandurna a makirinnupak iti uneg ti sangapulo ket dua a rounds ken kangrunaan, ti tangken-rikna a di agpangadua a mangtumba iti karupakna no maikkan iti gundaway.

Panunoten koma ni Pacquiao nga adda sabali a masakbayan nga agur-uray kenkuana, kalpasan ti boksing: ti politika.

Sino ti makaammo? Baka iti masakbayan, agbalin a senador, wenno no saluadanna ti dayaw ken naganna, posible a makapagbise presidente.#