Footer

EDITORIAL: Pannakabuangay task force maikontra private armies, epektibo kadi?

Itay nabiit, nabuangay ti task force maikontra kadagiti private armies iti Abra.

Mismo a ti deputry regional director for operations iti Police Regional Office iti Cordillera, ni Senior Supt. Elmer Soria,  ti mangidaulo iti Joint Coordinating Center Against Private Armed Groups, ken buklen dagiti pannakabagi ti Armed Forces of the Philippines, multisektoral a grupo a pakairamanan ti media, gunglo dagiti ministro dagiti nadumaduma a religion, Diocese ti Bangued, ken dadduma pay a grupo sibiko.

Nabara ti panangarakup dagiti umili ti Abra daytoy a task force ta napili ken saan a sinsinan dagiti kameng a mangipatungpal iti kangrunaan a panggepna a pannakaisardengen ti kultura ti kinadamsak nga agtaltalinaed ditoy a probinsia gapu iti panagraira dagiti armado a grupo a mapapati a menmenteneren dagiti nabibileg a politiko.

Maikkan iti bileg ti task force a mangmonitor kadagiti aktibidad dagiti politiko nga adda menmentenerenna a private armies, kasta met kadagiti polis ken militar nga agkumpiska kadagiti armas nga iggem dagiti politiko ken dagiti armado a pasurotda.

Mangangay pay ti task force kadagiti miting ken agireport kadagiti nangatngato a turayen tapno maiwayat dagiti wagas a mangkontra iti panagraira dagiti private armies.

Ngem ti dakkel a saludsod: epektibo ngata ti nasao a task force iti sanguanan ti mapaliiw nga aleng-aleng a panagtungpal dagiti politiko iti daytoy a probinsia?

Idi eleksion, nadumaduma nga addang ti naipakat tapno malapdan dagiti panagtambang ken pammapatay gapu iti politika ken adda pay komision a binuangay ti gobierno ngem nagtuloy latta ti kinadamsak a nakagudasan dagiti biag.

Ti ketdi kapaliiwan, nupay ipatalged dagiti politiko ti panangiwalindan iti kinadamsak, adda latta dagiti nalimed a mangmenmentener kadagiti private armies nga inarmasanda kadagiti nabibileg nga armas.

Tapno agtalna metten ti probinsia ti Abra, kasapulan ti sinsero a panagpapatang dagiti dadakkel a politiko tapno tratarenda ti kappia ken urnos ken talna. Kasapulan met ti natangtangken a panangipakat ti kapolisan iti ngipen ti linteg uray kasano kabileg ti maseknan a politiko.

Ta uray pinullo a mapirmaan a katulagan no awan ti kinasinsero dagitoy a mangtungpal iti karida, ken aleng-aleng laeng ti kapolisan ken militar iti pannakapugipog dagiti private armies ken agkaiwara nga armas, agtuloyto latta dagiti kinadamsak ket agbalinto latta a ganggannaet ti kappia, urnos ken talna ditoy a probinsia.#