Footer

EDITORIAL: Pannakaibasura ti Impeachment Complaint kontra ken ni Duterte

PIMMUDNO ti ninamnama dagiti adu a Pilipino, naibasura ti impeachment complaint kontra ken ni Presidente Rodrigo Duterte sadiay House of Representatives.

Sakbay ti Lenten break ti Kongreso, impila ni Magdalo Partylist Representative Gary Alejano ti impeachment complaint kontra ken ni Duterte gapu iti alegasionna a nakaro a panaglabsing iti Konstitusion gapu kadagiti pammapatay a naaramid ti Davao Death Squad idi mayor pay iti dayta a siudad, ti adu a pammapatay iti agdama a gerra ti gobierno kontra illegal a droga, ken ti pammabasol a kaadda dagiti nalimed a dakkel a depositona iti banko.

Iti panagsubli dagiti kongresista iti akemda kalpasan ti bakasion, nataming ti kaso ti impeachment a naipila kontra ken ni Duterte iti House Committee on Justice nga idauluan ni Rep. Reynaldo Umali. Sigud a naibasura ti reklamo uray naibilang dayta a “sufficient in form” ngem “insufficient in substance.” Saanen a nagpaut ti impeachment complaint iti panangtingiting da House Majority Floor leader Rodolfo Fariñas ken dagiti 42 a kongresista a saan a kimmanunong iti reklamo.

Imbilang dagiti kongresista a nangkontra iti reklamo a ti impeachment c omplaint ket agkurang iti sustansia ta awanan ti personal a pannakaammo ti complainant a ni Rep. Alejano, ngem dagitoy ket imbasarna laeng kadagiti testimonia dagiti self-confess a kameng ti Davao Death Squad a da Arturo Lascasñas ken Edgar Matobato.

Naupay met ni Alejano iti sigud a pannakaibasura ti reklamona kontra ken ni Duterte, ken saan a naikkan ti gundaway a nangilawlawag iti Committee on Justice ti kapanunotanna kas napagtulaganda iti Chairman ti komite. Nasuron pay isuna gapu iti pangta dagiti kaduana a kongresista a mabalin a mapilaan iti reklamo iti Ethics Committee gapu iti panangidarumna iti Presidente uray awanan isuna iti personal a pannakaammo kadagiti kaso a nangidarumanna.

Inyetnag metten ni Senador Antonio Trillanes, kaaliado ni Alejano, ken kritiko ni Duterte, nga iti pannakaibasura ti impeachement complaint ket ipamaysadan ti darum a Crimes against Humanity kontra iti Presidente iti International Criminal Court sadiay The Hague, Netherlands ta saan a maimpluensian wenno kontrolado ti administrasion.

Sakbay pay ti pannakaipila ti impeachment complaint kontra ken ni Duterte ket ninamnaman a ti reklamo ket awanto met laeng ti pagbanaganna ta kontrolado ti administrasion ti Kamara babaen kada House Speaker Pantaleon Alvarez, ken Senate President Aquilino Pimentel III. Iti ad-adda a bumilbileg a super majority, imposible ti panagdur-as ti impeachment complaint iti Presidente. Iti panaglabas dagiti bulan, ket umad-adu pay a kongresista ken senador dagiti kumapkappeng iti muper Majority.

Ammo la ketdi ni Alejano a narigat ti panagdur-as ti impeachment complaint ngem impilana latta ti darum ta kasapulan dayta tapno aksionan ti ICC ti reklamo a maipila kontra iti Presidente. Nasken nga adda umuna a maipila a darum kadagiti maseknan nga institusion iti Pilipinas ket no awan ti positibo nga aksion wenno pangngeddeng ket isunto ti panangtratar ti ICC iti kaso.

Adda dagiti naragsakan iti nadaras a pannakaibasura ti impeachment complaint ken ni Duterte ta ibilangda dayta a pakataktakan kadagiti gannuat dagiti kongresista, ken senador. Ngem saan ngata a nasaysayaat no natutor koma ti pannakaamiris ti kaso tapno naadal a nasayaat ti bugasna, saan ketdi a dagus a naibasura?

Ti impeachment laeng ti lehitimo a proseso tapno maikkat iti saad dagiti impeachable positions pakairamanan ti Presidente, Bise Presidente, dagiti mahistrado iti Korte Suprema, Ombudsman, ken dagiti mangidaulo ken kameng dagiti Constitutional Commission. Tapno maipakat ti hustisia kadagiti agipila ti reklamo, rumbeng laeng a matingiting ti darum no addaan dayta iti naan-anay a porma ken sustansia iti tumutop a panawen. Ngem iti kaso ti impeachment complaint ken ni Duterte ket naibasuran iti las-ud ti sumagmamano laeng nga oras iti ima dagiti kongresista iti administrasion ken dagiti dadduma a kameng ti oposision.

Narigat nga agballigi ti impeachment complaint ken ni Duterte gapu iti agtaltalinaed a panagtalek ken pammati kenkuana dagiti adu a Pilipino. Ngem sino ti mangipagarup a napasamak dayta iti nalatak idi a Presidente Joseph Estrada idi Nobiembre 2000 kalpasan dagiti eskandalo ti anomalia ti jueteng payola ken kurapsion nga imbulgar ti sigud a nasinged a gayyemna a ni ex-Ilocos Sur Governor Luis “Chavit” Singson. Kadua met idi ni Estrada da House Speaker Manuel Villar ken Senate President Aquilino Pimentel Jr. ngem kellaat a naggaraw ti naipila nga impeachment complaint iti Kamara agingga iti Senado.

Uray saan a ti mismo nga impeachment complaint ti gapu ti pannakaikkat ni Estrada kas Presidente, ngem dayta ti nangsilmut ti maikadua a people power iti EDSA a nangpatakias kenkuana iti saad ket simmukat kenkuana ni Bise Presidente Gloria Macapagal Arroyo.

Iti galad ken kababalin dagiti adu a politiko a Pilipino ket mapagduduaan ti kinapudnoda kadagiti partido ken kaaliadoda iti politika. Agkakaduada ita nga aldaw, ngem inton bigat, agkokontrada. Awan ti permanente a kadua wenno kabusor iti politika iti Pilipinas. Awan ti makasinunuo no agtultuloyto ti kinapudno dagiti kaaliado ti agdama nga administrasion. (Eden A. Alviar)