EDITORIAL: Pannakairehistro dagiti laptop, SIM cards, panangraut iti privacy ti maysa a tao

Inesponsoran ni Sen. Edgardo J. Angara ti maysa a gakat a mangituding iti pannakairehistro dagiti maar-aramat a laptop ken dagiti SIM cards tapno malapdan dagiti maisayangkat a cyber crimes.

Kangrunaan a puntiria ti gakat ti pannakalapped ti umad-adu a bilang dagiti krimen a maisaysayangkat ditoy pagilian ken iti ballasiw taaw babaen dagiti laptop ken saan a nakarehistro a SIM cards.

Kinapudnona, insingasing ti National Bureau of Investigation ti pannakairehistro dagiti laptop agsipud iti dumakdakkel a bilang dagiti maisaysayangkat a krimen iti cyberspace kas iti hacking, piracy, fraud, ken dadduma pay. Kangrunaan a rason ti pannakaparigatda a mangkamat kadagiti naglabsing agsipud ta wireless ti kagudua kadagiti maus-usar nga internet connections ditoy pagilian.

Naduktalan pay a napabettak babaen ti mobile phone ti bomba a naikabil iti maysa a bus a nakatayan ti uppat a tattao ken nakadundunoran ti 14 idi laeng Enero 25.

Saanen a makuna a virgin territory ti pagdalanan ti gakat ni Angara agsipud ta addan dagiti sumagmamano a pagilian a mangiyem-emporsar a mairehistro dagiti magatang a laptop ken nairehistron dagiti SIM card no mailako dagitoy.

Ngem saludsod: malapdan kadi daytoy a gakat no agbalin a linteg ti panagraira dagiti kolorum wenno saan a nakarehistro a laptop ken SIM card?

Pagarigan laengen ti paltog. Nupay kasapulan a mairehistro amin a paltog ken nadagsen ti pannusa dagiti matiliw nga agikut iti saan a lisensiado, agraira met latta dagiti kolurom a paltog ket dagitoy ti kangrunaan a maar-aramat iti krimen.

Agpayso, adda dagiti pagsayaatan ti pannakairehistro dagiti laptop ken dagiti SIM cards nangruna iti pannakirupak iti cyber crimes, ngem kitaen koma a nasayaat dagiti agilinlintegtayo ti posible a pannakalabsing ti kalintegan iti privacy dagiti agar-aramat nga umili ta no mairehistro dagitoy a ramit-komunikasion, mailanad ti nagan ti gimmatang, ken dadduma pay nga impormasion maipapan kenkuana a posible nga agbalin nga instrumento dagiti managdakdakes iti panangallilaw.

Adda singasing nga imbes a mairehistro dagiti laptop ken SIM card dagiti selpon, makikammayet ketdi koma dagiti law enforcement agencies kadagiti internet service providers ken kompania ti telekomunikasion para iti pannakamonitor dagiti maar-aramat a laptop ken selpon.

Kasapulan ngarud ti naan-anay a pannakaadal daytoy a gakat sakbay a palusoten dagiti senador tapno agbalin a linteg.#