Footer

EDITORIAL: Pannakapapatay ni Judge Lacasandile, maikkan koma iti hustisia

Maysa manen a biag ti kinettel dagiti kriminal a nagkalubbon iti motorsiklo ket ti makapadukem ditoy ta maysa a maraem a hues ti napapatay iti wagas a dina man laeng naikaluya ti biagna. Ti nakaam-ames a pannakapapatay ni Judge Reynaldo Lacasandile, executive judge ti Regional Trial Court Branch 20 ditoy Vigan City, idi agsapa ti Oktubre 4 ti dakdakamatenmi.

Segun iti inisial nga inbestigasion dagiti polis Tagudin, agur-uray ni Judge Lacasandile iti luganna nga agpa-Vigan idi inasitgan ti dua nga armado a tattao a nagkalubbon iti motorsiklo sa pinaltogan ti maysa ti hues a puon ti dagus a nakatayanna.

Aniaman ti motibo, nainget a kondenarenmi ti kasla piek a pannakagudas ti biag ni Judge Lacasandile ket ekspektarenmi a saan nga agsardeng ti kapolisan agingga iti saan a masolbar daytoy a kaso ken matuntonan ti hustisia ti pannakapapatayna. Saan koma a mairaman daytoy a krimen a maysa nga istatistika nga awanan iti pannakasolbar kas kadagiti nagkauna a pammapatay a nakagudasan ti biag dagiti hues, prosecutors ken dadduma pay a personnel ti korte iti sibubukel a pagilian.

Maysa daytoy a kaso a rumbeng a maipaayan iti makapnek a pannakasolbar agsipud ta maysa a hues ti napapatay. No maysa pay a maraem a hues ti kasla piek a patayen lattan dagiti masuspetsa a natangdanan a kriminal, anianto la ketdin dagiti ordinario nga umili, nangruna dagiti marigrigat ken awanan?

Umat-atiddog ti listaan dagiti biktima dagiti nakamotorsiklo nga armado a tattao a kuna pay ketdin dagiti dadduma a kailian a baro a bersion dagiti saka-saka idi dekada 1960s. Ikarkararagmi a saan koman nga agsubli daytoy a di panangipirpirit iti hustisia dagiti awan-bigbigbigenna a linteg nga armado a tattao nga agpatay lattan uray asino, uray payen iti hues. Dagitoy ita ti mangmangted iti dakes nga imahe ti probinsia ken mangkerras kadagiti maipagpannakkel a programa ti agdama a gobierno ditoy probinsia. Awan ti kaes-eskan dagitoy nga iwaywayat dagiti agtuturay ti probinsia tapno makaawis kadagiti agpuonan ditoy ken dumur-as ti probinsia no adda dagitoy nakaam-ames a pammapatay.

Isu a dawatenmi iti kapolisan a saanda nga agsardeng agingga iti saan a matiliw ken madusa dagiti kriminal a pimmatay ken ni Judge Lacasandile. Dawatenmi ti nainget a panangituloyda iti kampania kontra illegal a panagikut iti armas, panagreid kadagiti pagtaengan dagiti masuspetsa nga adda iduldulinna nga armas ken panangiwayatda iti naing-inget pay a panagpatrolia ken panag-checkpoint aglalo iti adalemen a rabii ken iti pumarbangon ta daytoy ti mapaliiwmi a pananggundaway ken panagkuti dagitoy a kriminal tapno ibanagda ti nangisit a panggepda kadagiti awan baelna a biktimaenda.#