EDITORIAL: Politika wenno boksing?

Panawenen nga agpili ni Sarangani Representative Manny Pacquiao no ania a direksion ti turongenna, ti politika wenno iti kinaboksingerona.

Makunami daytoy kalpasan a nairakurak kadagiti diario a ni Diputado Manny Pacquiao ti kaadduan iti langan iti session iti Kamara idi napan a tawen. Kaduana a managlangan ti maysa a tangkiran a last termer nga agilinlinteg manipud iti Negros Occidental, ni Diputado Julio Ledesma IV. Ad-adda nga am-ammo ni Ledesma a kas asawa ni Assunta De Rossi, nalatak nga aktres iti pelikula ken telebision.

Kas maibatay iti report, agpada da Pacquiao ken Ledesma a presente laeng iti Kamara iti pito nga aldaw. Kuna pay ti report nga aktual laeng a presente ni Pacquiao iti uppat nga aldaw ngem napakawan ti langanna a tallo pay nga aldaw ket naikonsidera a presente kadagita a tiempo.

Nupay kasta, “nagtrabaho” kano ni Pacquiao iti distritona iti 25 nga aldaw.

Saan a nakakaskasdaaw nga adu ti langan ni Pacquiao iti Kamara agsipud ta adu unay ti nakakumikomanna idi napan a tawen.

Madakamat ditoy a malaksid a boksingero, politiko, aktor pay iti pelikula ni Pacquiao ken kumakanta, ken itay nabiit, maysa payen a playing coach iti basketbol.

Idi napan a tawen, namindua a nakiboksing ni Pacquiao. Kinarupakna ni Timothy Bradley idi Abril ken ni Chris Algieri idi Nobiembre. Inabak ni Pacquiao dagiti dua babaen iti unanimous decision.

Sakbay ti pannakiboksingna kada Bradley ken Algieri, impamaysa ni Pacquiao ti nagsanay, imbes a mapan dumar-ay iti session iti Kamara, kas nabutosan a mangibagi iti Sarangani. Ket ti nakaap-apal, agsusueldo la ngaruden kas nabutosan a diputado, dakkel pay ti inawatna a gunggonana iti pannakiboksingna kada Bradley ken Algieri.

Anian a naggasat a parsua ni Diputado Manny Pacquiao! Ngem awan ti imposible ditoy Pilipinas. Ditoy pagilian, uray aggaama, aggiina, agkakabsat, agguuliteg, agkakasinsin, mabalinda latta ti agsisinnublat iti takem.

Saan la a pagsisinnublatan, pagtitinnawidan pay!

Kasta met a ditoy pagilian, mabalinmo ti agbalin a part-time actor, komediante, komikero, modelo iti sabon wenno losion ken uray ania ditan a pagkaudan iti kuarta, malaksid kadagiti awatem a kas opisial a binutosan dagiti tattao.

Kas nakunamin, id-iduluen dagiti tattao ni Manny Pacquiao. Awanto ngatan ti sabali pay a makapatar iti nagapuananna iti tay-ak ti boksing. Tangtangaden uray dagiti apisionado iti boksing iti nadumaduma a paset iti lubong.

Posible a saanton a mapataran ti kaadu ti inubonna a pammadayaw iti boksing. Agasem ta nagbalin a kampeon iti walo a dibision!

Ngem saan kadi a nakababain a ti maysa a mararaem a boksingero ket managlangan met gayam nga agilinlinteg ket saanna met gayam a mategtegged dagiti aw-awatenna a sueldo a kas diputado ken dagiti nadumaduma a benepisio ken karbengan gapu ta saan met a dumardar-ay iti session, kas nabutosan a mangibagi iti Sarangani?

Politika wenno boksing? Kas nakunamin: panawenen nga agpili ni Pacquiao iti pangipamaysaanna iti imatang ken kabaelanna. Saan a mabalin nga agrapit ti kinaboksingerona iti kinaagilinlintegna. No agpada ti boksing ken politika a pangipaayanna iti atensionna, agsagaba ti serbisiona agsipud ta mabaybay-anna ti pagrebbenganna iti maysa kadagitoy. Saan a nasayaat dayta iti imahena kas boksingero wenno kas diputado.

Ala, itedtayo amin a panawen ken ni Pacquiao nga agpanunot a nalaing.

Kalpasan ti dua pay a pannakiboksingna iti ring? Aglalo ket dakkel ti posibilidad a matuloyen ti nabayagen a tartarigagayan dagiti tattao a mabuya, ti panagbinnurakda iti rupa ken ni Floyd Mayweather tapno maammuanen
no asino ti nalalaing ken nasigsiglat a boksingero kadakuada a dua ken akuyenna ti megabucks a maitanggaya dagiti promoter iti daytoy a panagsangoda a dua a maibilang a best pound for pound boxers iti arena ti boksing!#