EDITORIAL: Problema ti landslide iti Banaoang, itan ti panagtignay dagiti agtuturay!

Idi Oktubre 4 a panangduprak ni Bagyo Pepeng iti Amianan a Luzon a pakairamanan ti Ilocos Sur, nagdarusdos a nagpababa dagiti pitak ken dadakkel a batbato manipud iti bakras ti bantay iti Barangay Banaoang ket ginaburanda ti kalsada sakbay ti daan a Quirino bridge.

Gapu iti daytoy, kilometro ti kaatiddog dagiti nataratar a lugluan iti agsumbangir a paset ti rangtay a naguray iti pannakaiwalin ti landslide iti baet ti adu a sakuntip, tanabutob, sikor ken amak dagiti ginasut a biahero a maganatan a makaawid iti taengda gapu iti kinadakes ti panawen.

Babaen ti panagtitinnulong dagiti ekuipo dagiti pribado a kontraktor iti probinsia (adda met inyarayat ti DPWH ngem anian ta nagdaras a nagdadael), naipaigid dagiti pitak ken bato ket naluktan met laeng ti trapiko.

Ngem kadagiti simmarsaruno nga aldaw, naulit-ulit ti pannakaiserra ti trapiko iti daytoy a lugar gapu iti panagkarusdos ti pitak ken batbato manipud iti bantay gapu iti di agsarday a panagbayakabakna.

Sa laeng nagsardeng ti landslide idi timmalna ti panawen idi pimmanaw met laeng ni Bagyo Pepeng kalpasan ti makalawas a panagsublisublina iti Ilokos.

Kinapudnona, nakitamin daytoy a problema idi pay la napan a tawen idi nagkaruskos dagiti pitak ken batbato iti daytoy a paset ti bantay iti Banaoang idi adda simmangbay a bagyo. Suspetsami idi a rimmuka iti maysa a paset iti lulonan ti bantay gapu ta nakisangen dagiti kayo a manglapped iti panagkaruskos ti daga aglalo no matudtuduan iti mabayag.

Ngem iti maysa nga interbio ti maysa a lokal a radio station iti konsehal nga agnaed iti Barangay Banaoang, nadakamatna a suspetsana a makagapu iti landslide ti pannakapabettak ti dinamita idi abutanda ti bantay tapno adda pangilasatan dagiti tubo a paglasatan ti danum manipud iti Karayan Abra a kunnoten ti makina a dumanon kadagiti kataltalonan dagiti nadumaduma nga ili iti First District. Naisalpika pay ti konsehal nga iti sabali a bagyo, dua a balay ti ginaburan ti pitak.

No pudno ti suspetsa ti konsehal, nakarkaro ti problema a kasapulan a maikkan a dagus iti naan-anay nga atension.

Umayonkami iti singasing ni Vice Gov. Jerry Singson a kasapulanen nga adda mabukel a grupo nga umuli iti bantay tapno sukimatenda no ania ti makagapu iti panagreggaay dagiti daga ken bato iti nasao a bantay.

Umayonkami pay iti indagadagna a pannakamula iti aglawlaw ti nasao a bantay tapno masalakniban daytoy a paset ti bantay.

Ngem iti biangmi, saan a pangdarasan a solusion ti singasing ni Vice Gov. Singson nga isu ti kasapulan iti kastoy a situasion. Kasapulan ti madagdagus a pannakarisut ti problema a makaigapu iti panagreggaay ti daga iti bantay ti Banaoang. Adu a tawen ti urayen santo makadakkel ken makarangpaya dagiti kayo a maimula iti nasao a bantay. Iti dayta a panawen, kadaksan a senario ti pannakagabor ti Barangay Banaoang a mangipaay iti nakaro a panagsagaba dagiti agindeg ditoy a lugar.

Kasapulan itan ti naan-anay a panagtignay tapno marisut daytoy a problema iti Banaoang. Saan koman nga iyuray dagiti agtuturay nga adda dagiti biag a maisagmak sakbayda nga agkuti.#