EDITORIAL: Progreso nga ipangpangkusaw ti gobierno, di marikna dagiti umili

Sangkaipadayaw ti nasional a gobierno nga adu ti simmayaatan ti ekonomia ti pagilian babaen ti panangimaton ti administrasion nga idadauluan ni Presidente Benigno Aquino III. Ngem dagus nga ibato dagiti kritikona: marikna kadi dagiti umili ti panagdur-as ti ekonomia ken adda kadi simmayaatan ti panagbiagda?

Ngem agparparang a patalgedan ti resulta ti surbey nga insayangkat ti Social Weather Stations (SWS) nga iti sumaysayaat nga ekonomia ti pagilian, bimmassit ti bilang dagiti Filipino a makarikna nga adda simmayaatan ti biagda. Iti surbey nga inwayat ti SWS manipud idi Hunio 5 agingga iti 8, 2015, 28 a porsiento dagiti respondente ti nangibatad nga adda simmayaatan ti panagbiagda iti napalabas a makatawen. Ngem ti adatna, bimmaba daytoy a bilang manipud iti 32 a porsiento dagiti nangibaga a simmayaat ti biagda iti surbey nga insayangkat ti SWS idi Marso daytoy met laeng a tawen.

Iti sabali a bangir, nagtalinaed a 26 a porsiento kadagiti respondente ti nagkuna a dimmakes ti biagda kas maibatay iti second quarter survey ti SWS.

Agdagup iti 42 porsiento kadagiti respondente ti nagkuna nga ekpektarenda a sumayaat ti kalidad ti biagda iti sumaruno a 12 a bulan, idinto nga innem a porsiento kadagiti respondente ti mamati a dumakdakes ti klase ti panagbiagda nga agresulta iti net personal optimism score iti 36 manipud iti 37 idi Marso daytoy a tawen.

Kuna ti SWS a kadakkelan ti mangnamnama iti nasaysayaat a kalidad ti panagbiag iti Mindanao nga immabut iti 40 porsiento iti net personal optimisim. Maymaysa a punto ti ngimmatuan iti NPO iti Visayas (29) idinto a bimmaba iti Metro Manila (36) ken Luzon (37).

Segun pay iti SWS, nagtalinaed a nangato ti neto a personal a namnama dagiti amin a socio-economic classes ket kadakkelan dagiti respondente manipud iti class E nga immabut iti 39.

Ania ti kayat a sawen daytoy?

Patalgedan ti surbey ti kapaliiwan nga uray iti baet ti kinarigat ti panagbiag ken iti isasangbay dagiti kalamidad, ad-adu ti bilang dagiti kailian a mangnamnama a sumayaat ti biagda ken iti ekonomia iti sumaruno a sangapulo ket dua a tawen.

Kasta ni Filipino. Saan a nalaka a parmeken dagiti agsasamusam a parikutna iti biag, nadadagsen a didigra ken kalamidad. Mabalin a maitublak wenno maidaramudom, ngem tumakder latta ken umalut-ot iti nakailumlomanna agsipud ta adda kenkuana ti kidser ken napinget a determinasion nga agbiag.#