EDITORIAL: Proposed salary increase, siempre iyuna dagiti nangangato nga opisial ti bukodda a pagimbagan

Inaprobaran ti komite iti apropriasion iti Kamara iti maikadua a panagbasa ti singasing a P226 billion a baro a rikos ti salary increase para kadagiti empleado iti gobierno.

Naipalaon iti HB 6268 a pinutar da House Speaker Feliciano Belmonte, Jr., Majority Leader Neptali Gonzales II, Minority Leader Ronaldo Zamora ken dadduma pay a diputado ti naisingasing a Salary Standardization Law 2015 kas imbilin ni Presidente Aquino ket maited daytoy iti las-ud iti uppat a tawen.

Naipalaon iti budget para iti 2016 ti P50.4 billion para iti pannakaiyimplementar ti salary increase iti umuna a tawen a mangrugi inton Enero 2016. Maipalaon met ti pondo para iti sumaruno a tallo a tawen iti annual national budget.

No patien ti Confederation for Unity, Recognition and Advancement of Government Employees (COURAGE) ken ni Alliance of Concerned Teachers Rep. Antonio Tinio, maipangato laeng ti increase iti sueldo dagiti mangisursuro, nurses, soldado ken polis iti 11-12% idinto a 100-233% iti ingangato ti sueldo dagiti nangangato nga opisial ti gobierno a pakairamanan ti Presidente.

Ngem segun ken ni DBM Secretary Florencio Abad, 30% ti ngatuan ti sueldo dagiti mangisursuro agsipud ta mairaman ditoy ti mid-year 14th month pay ken ti performance bonus a maingato agingga iti dua a bulan.

No kitaen nga agpayso, ad-adda a mapaboran dagiti nangangato a turayen iti daytoy a salary increase ngem ti rank and file. Ngem isuda ti aggamulo, dida ketdin ipamuspusan nga isuda ti ad-adda a mairanud? Mamatika ketdin a ti pagimbagan ti kaadduan ti yunada a kitaen a di ket ti bukodda nga interes?

Iti sabali a bangir, alaentayo a pagarigan ti maysa a pamilia. No dua laeng ti anakna, kabaelanna la ketdi nga ingatngato ti alawansda no makita dagiti nagannak nga agkurang. Ngem no sangapulo dagiti annakna, kabaelanna ngata nga ingato unay ti alawansda a saan a maisakripisio dagiti sabali a kasapulanda iti biag? Kasta ti kasimple (wenno karikutna) daytoy nga isyo.

Ti ketdi maisingasingmi. Sangsangkamaysa nga agtimek itan ti rank and file. No napigsa dagiti timek, pagtignayenna dagiti bulsek ken bangag a politiko ken agtuturay. Nangruna ket Eeleksion inton umay a tawen. Yagawa ketdi ti mangkidag kadagiti politiko ta nalakada a kasarsarita iti daytoy a panawen tapno dakdakkel ti maalada ngem ti sangkapit-ing nga itangtanggaya ti gobierno a nayon ti sueldoda.

Kalpasan daytoy eleksion, diyonto manen maarikap dagiti politiko. Kaarigdanto manen Houdini a nalaing nga aglibas ken aglemmeng!#