Footer

EDITORIAL: Puling a mamagkirem laeng iti apagkanito

Ti resulta ti eleksion iti Isabela ken iti Pampanga ti pammaneknek a saan a kabaelan a bukkualen ti napigsa a tarigagay nga agserbi ti nakaun-uneg a ramut dagiti nabileg a politiko kadagitoy a probinsia.

Dakdakamatenmi ditoy da naabak a gobernador ti Isabela Grace Padaca ken ni gobernador ti Pampanga Ed Panlilio.

Iti eleksion itay Mayo 10, 2010, ni incumbent Rep. Faustino “Bogie” Dy III iti maikatlo a distrito ti Isabela ti  impasango ti nabileg a pamilia Dy a kasango ni Gov. Padaca.

Madakamat ditoy nga iti napalabas a dua nga eleksion, imbalat ni Padaca dagiti kinabalubalna a kameng ti pamilia Dy. Ngem iti daytoy maikatlo a rikos ti pannakirupakna kadagiti Dy, iti daytoy a gundaway, natumba ni Padaca.

Iti met biang ni Pampanga Gov. Ed Panlilio, idi 2007, nagbalubalda ken ni Lilia Pineda, asawa ti mapapati a jueteng lord ken nasinged ken ni Pres. Gloria Arroyo, para iti kinagobernador iti Pampanga.

Nangabak ni Panlilio iti baet a kaaliado ni Pineda dagiti dandani amin a mayor iti probinsia.

Nagprotesta ni Pineda ket sakbay ti eleksion, inkeddeng ti Commission on Elections a nangabak ni Pineda. Nagapela ni Panlilio tapno agtalinaed iti puestona.

Ngem iti eleksion itay Mayo 10, insualiten ni Pineda ni Panlilio.

No taldiapan ti historia ti politika iti pagilian, makunatayo a nupay napagballigian da Padaca ken Panlilio a pinarintumeng dagiti nabileg a politika iti probinsiada, saanto nga agtalna dagitoy a mangparukma kadakuada.

Naggapu a mismo iti bibig ni Padaca a dina ninamnama nga iti kalkalpas nga eleksion ket makagun-od pay iti kasta kaadu a butos (nasurok laeng a 3,000 ti diperensia ti butosda), iti sanguanan dagiti mapapati a nagraira a panaggatang iti butos, black propaganda ken pammutbuteng kadagiti botante ken dagiti pasurotna.

Iti met biang ni Panlilio, maysa a padagsen iti administrasionna ti kaawan ti suporta a naalana manipud iti hunta probinsial ken kadagiti mayor a kaaliado ni Bokal Lilia Pineda.

Kangrunaanna, nagkandidato ni Pres. Arroyo para iti kinadiputado iti maikadua a distrito ti Pampanga. Madakamat ditoy a ni Dip. Mikey Arroyo ti incumbent a mangibagi iti nasao a distrito ngem impabus-oyna iti inana. Iti kaudian a damag, adda namnama ni ub-ubing nga Arroyo nga agsubli iti Kamara kas nominee ti Ang Galing Pinoy party list  a mangibagi iti  grupo security guards.

Iti panagkandidato ni Pres. Arroyo iti kinadiputado iti Pampanga, makunatayo ngarud a nairaman ni Panlilio a naiyanud ken naarinebneb iti nalanaan a makinaria ti Presidente.

Dakkel a leksion daytoy da Padaca ken Panlilio ken manglukais iti mata dagiti umili a ditoy Pilipinas, nauneg unayen ti ramut ti bileg dagiti patneng a politiko kadagiti nadumaduma a probinsia ken siudad ket arig laeng puling dagiti sumagmamano a sumangdo kadakuada a mamagkirem kadagitoy a politiko iti apagbiit a tiempo.

Nasakit nga annugoten ngem kastoy ti politika iti Pilipinas.#