EDITORIAL: Purawton ti wak no pumasa ti anti-political dynasty bill

Iti State of the Nation Address ni Presidente Benigno Aquino III, inyendorsona ti pannakaipasa ti anti-political dynasty bill iti Kongreso. Mabalin a nagrirokami, ngem madlawmi a napilpilit ti panagsipat dagiti agkakantan-ok a senador ken diputado iti panangiyendorso ti presidente iti anti-political dynasty bill a no manon a dekada a matrattratar ngem arig naipagket iti narugit a suelo ti Kongreso.

Saanen a nasken nga ibinsabinsatayo no apay nga awan ti interes dagiti agkakadayaw nga agilinlinteg iti Kongreso nga ipasa ti anti-political dynasty bill. Ngem agdadata a dida kayat a lumsot daytoy a gakat tapno agbalin a linteg agsipud ta maseknanda unay, kaarigna a biag ken masakbayanda ti nakataya a posible a pakaitaneman ti ambision, dardarepdep ken bileg ken ramutda iti politika.

Saankami a masdaaw idi imbalikas ni House Secretary Feliciano Belmonte a saanna a masiguro no pumasa ti anti-political dynasty bill iti Kongreso iti daytoy a panangiyendorso ni Presidente Aquino.

Kinuna ni Belmonte nga agbaliw la ketdi ti panunot dagiti agilinlinteg a mangkonkontra iti pannakaipasa ti anti-political dynasty bill ngem agduadua no pumasa daytoy iti House of Representatives a kaadduanna kadagiti miembro ti sangsangkamaysa laeng a pamilia ken agkakabagian.

Saludsod: agbaliw kadi pay ti panunot dagiti politiko gapu laeng ta inyendorso ni Presidente Aquino ti pannakaipasa ti anti-political dynasty bill? Kasano ti panangrippuogmo iti pundasion ti dinastia a politikal nga iti manon a dekada ket nagsepsepan dagiti politiko iti bileg, naipanurok nga imbag, natagtagibi a respeto ken dadduma pay nga interes a nangitag-ay kadakuada iti pedestal a pakatangtangadan laeng kadagiti didiosen?

Saanen a nasken nga iwarastayo ti matatayo kadagiti ili, siudad, ken probinsia ken uray iti nasional tapno makitatayo ti namsaakan ti dinastia a politikal iti biag dagiti umili, nangruna dagiti nagilako kadagiti butosda, dagiti naglablab iti dakulap dagiti amoda a politiko, dagiti nangibaag iti ipusda iti sakaanan dagiti didiosen tapno laeng matinnaganda iti sangkaballing a kantidad a di pay umanay nga igatang iti barikes a pangsirut iti agbisbisaleg a tianda, dagiti substandard nga inprastruktura, dagiti panagkunniber ken korapsion iti nangato a koridor ti gobierno, dagiti pondo para kadagiti marigrigat nga agtarus iti bulsa dagiti buklis ken managimbubukod.

Ala wen, adda siguro pagnaan ti panangiyendorso ni Presidente Aquino iti anti-political dynasty bill tapno pumasa iti Kongreso. Nupay, patienmi a purawton ti wak no mapasamak dayta, agkalumbitintayo iti ingget pino a linas, kumpettayo iti uray sangkapit-ing a namnama barbareng no dumteng ti milagro a mamagbaliw iti panunot dagiti politiko ket ipasada ti gakat iti Kongreso.#