EDITORIAL: Responsibilidad

Di pay naiwagsak no ar-arigen ti alingget ken sanaang a pinarnuay ti nadagem a pannakalned ti maysa a ferry sadiay South Korea a nakaibuisan dagiti biag, ita adtoy manen ti sabali a makapakintayeg a damag: nagbekkel ti vice principal ti high school a nangkuyog kadagiti estudiante iti panagbiaheda iti limned a ferry.

Naipadamag pay laeng idi Huebes a mapukpukaw ni Kang Min-gyu, 52, ngem nasarakan laengen ti bangkayna a nakabitin iti maysa a kayo iti asideg ti lugar a pagguummongan dagiti pamilia dagiti estudiante nga agur-uray iti uray sangkapit-ing a damag a naisalakan dagitoy iti baet a bumasbassit ti namnamada a sibibiag pay dagitoy.

Maipalagip a nalned ti Sewol, maysa a ferry a nagkarga iti 476 a pasahero ken crew bayat ti panagbiahena manipud iti puerto ti Incheon a mapan iti abagatan nga isla ti Jeju.

Kaadduan a pasahero ti nasao a ferry dagiti estudiante iti Danwon High School ket kinuyog ida ni Kang Min-gyu kas vice principal ti pagadalan.

Iti kaudian a damag, agdagupen iti duapulo ket walo dagiti naireport a natay iti trahedia, 174 dagiti naisalakan ken 274 dagiti mapukpukaw pay.

Bayat a masursurat daytoy, napigsa a koriente ken nalibeg a danum ti karuprupak dagiti divers tapno makadanonda iti limnedan ti bapor. Iti panaglabas dagiti aldaw, bumasbassit met ti namnama dagiti pamilia dagiti mapukpukaw nga adda pay a sibibiag dagitoy.

Daytoy ti kadagsenan nga aksidente iti maritime ti South Korea iti uneg ti 21 a tawen, ket madama ti panagimbestiga no ania ti nakagapu iti pannakalned ti bapor.

Segun iti maysa a report, mapapati a nakaro a nagkurba ti bapor ket naggisin dagiti kargamento a nagtungpal iti panagirigna sakbay a nalned.

Inaresto met dagiti otoridad ni Captain Lee Joon-seok gapu iti mapapati a kaawanna iti bridge idi mapasamak ti aksidente. Naibilin pay ti pannakaaresto ti junior officer ken maysa a crew member gapu iti panagliwayda iti pagrebbenganda a mangisalakan kadagiti pasahero. Segun kadagiti saksi, ti kapitan ti immuna a nangpanaw iti malmalned a bapor.

Ngem adu ti sumngay a saludsod iti panangkettel ni Kang Min-gyu iti biagna idinto a maysa kadagiti naisalakan iti nalned a bapor.

Ditoy ti pakapaneknekan nga iti South Korea, napateg ti dayaw. Katimbeng ti biag ti dayaw. Iti baet a saanna a pinanawan dagiti kinuyogna nga estudiante ken kaawan ti gawayna a mangisalakan kadakuada gapu iti di napakadaan nga aksidente, ken ni Kang Min-gyu, naipabaklay iti abagana ti responsibilidad iti pannakatay dagiti estudiante ti pagadalanda kas vice principal. Kenkuana, responsibilidadna dagiti estudiante ket ibilangna a nagliway iti daytoy a responsibilidad gapu iti pannakatayda uray iti baet nga awan ti kontrolna iti napasamak.

Kenkuana, iti pannakatay dagiti kinuyogna nga estudiante, napukaw metten ti dayawna.

Isu a kinettelna ti biagna.

Umuk-ukuok iti lansadmi ti katadem ti sugat iti puso ni Kang Min-gyu idi makitana ti panagtutuok dagiti pamilia dagiti natay ken mapukpukaw. Mariknami ti panagpasanaangna iti panangpampanunotna iti kaawan gawayna a nangisalakan kadagiti estudianteda. Ngem nupay agladingitkami, makariknakami ketdi iti pannakkel ta adtoy ti maysa a tao a mangibilang ti responsibilidad a kapatgan iti amin, uray pay kaipapananna ti panangkettelna iti bukodna a biag.

Iti daytoy a panawen, manmano ti kas ken ni Kang Min-gyu.

Pagsarmingan koma daytoy dagiti agtuturaytayo nga iti baet ti pannakaawagda a madaydayaw, agal-alingasaw met ti buyok ti dakes nga aramid ken kinarukerda.

Kadagitoy nga agtuturaytayo, umuna ti responsibilidadda iti bukodda nga interes ken pagimbagan, sumaruno laeng interes ti pagilian,

A ngem sabali ti kaipapanan ti responsibilidad iti South Korea iti responsibilidad iti pagiliantayo a Filipinas.

Ket dayta ti pakaidagelantayo a Filipino.#