Footer

EDITORIAL: Retirement benefits dagiti barangay officials, barangay workers, panawenen a maited iti panagretiroda

Indagadag itay nabiit ni Senador Bongbong Marcos ti madagdagus a pannakaipasa ti gakat a mangited iti retirement benefits kadagiti opisial ti barangay ken agtrabtrabaho iti barangay.

Iti panangidagadagna iti pannakaipasa ti gakat, kinuna ni Marcos, chairman iti Senate Committee on Local Govern-ment, a rumbeng laeng a maikkan iti retirement benefits dagiti village workers a pakairamanan dagiti barangay officials agsipud ta isuda dagiti maipaspasungalngal iti pannakaipaay dagiti basic services kadagiti umili nangruna kadagiti bumarangay.

Karaman dagiti benepisario iti nasao a gakat dagiti kualipikado a barangay captain, miembro ti sangguniang barangay, barangay treasurer ken secretary, dagiti barangay tanod, kameng iti lupon ng tagapamayapa, barangay health worker, ken barangay day care worker.

Inrekomenda ti komite ti pannakaited iti retirement benefit a P100,000.00 para iti barangay captain; P80,000.00 iti sangguniang barangay; ken P50,000.00 tunggal barangay treasurer, secretary, barangay tanod, miembro iti lupon ng tagapamayapa, barangay health worker ken barangay day care worker.

Saklawen daytoy a benepisio dagiti agretiro a barangay official nga agtawen iti 60 ken nagserbi iti saan a nababbaba ngem siam a tawen iti panna-kadanonna iti panagretirona.

Maited pay daytoy a benepisio iti official wenno worker a matay wenno permanente a din makatrabaho kabayatan iti panangannongna iti pagrebbenganna.

Awan a pulos ti panaggudengmi nga umayon iti pannakaipasa a dagus iti nasao a gakat agsipud ta rumbeng laeng a maikkan iti benepisio dagitoy a barangay officials ken dadduma pay nga agtrabtrabaho iti barangay no agretirodan iti serbisio.

Saan a palimed a sang-kaballing laeng ti honorarium wenno alawans (saan a sueldo) dagitoy a barangay workers idinto a saan a magatadan ti akemda iti pannakapataray ti gobierno ti barangay, pannakatagiben ti urnos ken kappia iti barangay ken iti pannakaipaay dagiti serbisio ti salun-at ken edukasion.

Napapanawen ngarud ti pannakaipasa daytoy a gakat iti Senado tapno sagrapen metten dagiti barangay officials ken workers dagiti benepisio a rumbeng laeng a maited kadakuada kas subad iti naunday a panagserbida iti barangayda ken iti komunidad.#