EDITORIAL: Right of Reply bill: maysa a panangbusal iti prensa

Maysa a gakat – ti Right of Reply – ti konkontraen dagiti journalists iti sapasap a pagilian agsipud ta maseknanda unay. No pumasa daytoy ket agbalin a linteg, arigna nakettel metten ti kalintegan dagiti agiwarwarnak a mangirakurak iti kinapudno agsipud ta agbalin daytoy a kasla espada ni Damocles a nakabitin iti ulonanda.

Narigat a maawatan no apay a maysa pay a pasado a presidente iti gunglo dagiti kameng ti prensa, ni Dip. Monico Puentevella, ken maysa kadagiti nangiruprupir iti kalintegan nga agsao ken agirakurak idi tiempo ti Martial Law, ni Sen. Aquilino Pimentel,  dagiti nangesponsor iti Right of Reply Bill.   Mabalin nga iti napalabas, napasugkian wenno natugkik ti amor propio dagitoy nga agilinlinteg gapu iti panangkritikar kadakuada dagiti kameng iti prensa. Aniaman ti gapuna, makitkita ti gakat nga inesponsoranda a maysa a panangsalungasing iti Konstitusion.

Nalawag ti probiso ti Konstitusion: “awan ti maipasa a linteg a mangleplep iti wayawaya ti panagbalikas ken iti prensa.”

Sagudayen daytoy a gakat ti pannakapilit dagiti news organizations a mangited iti agpada nga espasio wenno air time ken kaprominente iti maysa a tao wenno entidad a nababalaw wenno nakritikar iti damag a naipablaak iti maysa a pagiwarnak  wenno estoria a nairakurak iti maysa a newscast wenno programa iti radio wenno telebision.

Iti daytoy a linaon ti nasao a gakat, no nakritikar ti maysa a politiko iti pagiwarnak man wenno iti radio ken telebision, maporsar ti editor wenno ti news organization a mangireserba iti espasio a pakaipablaakan wenno air time a pakaipatangatangan ti sungbat ti nasao a politiko.

Namak payen no santo la sumungbat ti politiko makalawas kalpasan ti pannakakritikarna idinto nga adda deadline a kamaten ti pagiwarnak wenno newscast iti radio wenno telebision?

Maysa pay, gundawayan la ketdi dagiti politiko daytoy a linaon ti gakat tapno maikkanda iti gundaway a sumungbat nga agbanag a libre nga anunsio wenno advertisment a mangitag-ay iti nagan wenno kandidaturada.

Iti sabali a bangir, saan a basta agkritikar lattan ti maysa nga agiwarwarnak no awan ti pagibasaran wenno pagbatayanna. Nainget ti  panagpolisia dagiti agiwarwarnak ken broadcasters kadagiti kabaddungalanda a saan a kasapulan ti pammalagip manipud kadagiti politiko ken nangangato nga agtuturay a gapu iti posisionda, rumbeng laeng a transparente amin a tignay ken aramidda tapno saanda a madillaw wenno makritikar.

Rumbeng nga ibasuran ti Kamara ken Senado daytoy a gakat agsipud ta agparang laeng nga idurduronda daytoy tapno adda pangkontrolda kadagiti kameng ti media a saanda a magemgeman.

Ngem nagbiddutda no namnamaenda a mabusalanda ti prensa. Agtultuloyto latta nga agsipsiput ti prensa agsipud ta adu dagiti isyo a pakaseknan dagiti agtuturay a kayat dagiti tattao a mangeg.#