Footer

EDITORIAL: Saan a kualipikado nga agisuro

Aglukat manen dagiti klase inton Hunio 15. Iti daytoy nga aldaw, agsubli manen a mapan agbasa dagiti rinibribu nga ubbing kadagiti nadumaduma a pagadalan iti elementaria ken sekundaria iti publiko.

Sakbayna, iti umuna a lawas ti bulan, babaen ti inyussuat ti Department of Education a Brigada Eskwela, insagana dagiti mangisursuro, nagannak ken dadduma a sektor kas dagiti kameng ti polis, ken dagiti agtutubo, dagiti nadumaduma a pagadalan iti pagilian babaen ti panagdalusda iti kuarto, iti aglawlaw dagiti pagklasean, pannakatarimaan dagiti tugaw, lamisaan ken desks, pannakapinta dagiti bulletin ken display boards ken dadduma pay tapno dagus nga agklase dagiti ubbing iti umuna nga aldaw a panaglulukat ti klase.

Ngem saan a mailibak nga adu latta dagiti problema a sangsanguen dagiti agtuturay ti DepEd tunggal panaglulukat ti klase. Kas koma dagiti agkurkurang a pagkuartuan gapu iti dumakdakkel a bilang dagiti agbasa, pagtugawan ken lamisaan, dagiti mapirpirpir a libro a pagsusublatan dagiti estudiante, dagiti agkurang a ramit a kasapulan dagiti mangisursuro iti panagisuroda.

Ngem adda pay sabali a problema dagiti agtuturay iti DepEd a kasapulan a maikkan iti naan-anay nga imatang gapu ta daytoy ti mapaliiw a kangrunaan a maysa a makagapu iti panagpababa ti kalidad ti edukasion ditoy pagilian: ti panagkurkurang dagiti mangisursuro nga agisuro iti siensia ken matematika iti elementaria ken sekundaria a pagadalan.

Iti maysa a naisayangkat a surbey, limtuad a kaadduanna kadagiti teachers ti saan a kualipikado nga agisuro kadagitoy dua nga asignatura. Kayatna a sawen, kaadduanna kadagiti agisursuro iti siensia ken matematika ti non-majors wenno non-minors kadagitoy a subjects.

Gapu iti daytoy, saan ngarud a nakakaskasdaaw no apay a nakapsut iti siensia ken matematika dagiti agbasbasa.  Gapu ta dida kualipikado nga agisuro iti siensia ken matematika, adda kuskuselna dagiti isuro dagiti science ken math teachers  kadagiti ubbing.

Daytoy ngarud koma ti ipangpangruna a kitaen dagiti adda iti DepEd. Ti siensia ken matematika ti kangrunaan a pundasion para iti panagdur-as ti maysa a pagilian. Dagitoy ti kangrunaan a komponente ti industrialisasion ket no saan a maitaltalek daytoy a problema, agtultuloyto latta ti Pilipinas a pagilian nga  agipatpatulod kadagiti domestic helpers, care givers, hospital aides, drayber, factory workers ken dadduma pay a nababa a pagsapulan.

Kasapulan nga ingatngatotayo ti agpang ti sistema ti edukasion ditoy pagilian. Magun-odtayo laeng daytoy no tulongantayo dagiti mangisursurotayo nga agbalin a kualipikado nga agisuro iti siensia ken matematika. Kas umuna nga addang, mangisayangkat koma ti DepEd kadagiti aglinawas a panagsanay wenno summer classes kadagiti saan a kualipikado a mangisursuro tapno manayonan iti ammoda ken teaching skillsda iti siensia ken matematika.

Adda pagsasaotayo: saanmo a maited ti awan kenka. Saantayo a mababalaw dagiti mangisursuro no saanda a naan-anay a makaisuro iti siensia ken matematika agsipud ta agkamtud met ti ammoda maipapan kadagitoy nga asignatura.#