EDITORIAL: Saan a patas ti laban

Itay apagtapog ti bulan ti Disiembre, impaulog ti Korte Suprema ti desision a mapalubosan dagiti nadutokan nga opisial iti gobierno nga agtalinaed iti puestoda uray kabayatan ti panagtarayda iti pabutosan a puesto iti 2010.

Iti daytoy a desision ti Korte Suprema, inwalinna ti resolusion ti Commission on Elections a nangibatad a maibilangen a naglusulos dagiti maseknan nga opisial apaman a naipilada ti certificate of candidacyda (COC) iti nasao a poll body.

Yan ti imas (ken paitna), rimmuar daytoy a desision ti Korte Suprema iti maudi nga aldaw a panagipila iti COCs a nangrugi idi Nobiembre 20 ken nagpatingga iti tengnga ti rabii iti Disiembre 1.

Iti biangmi, dikami kumanunong iti daytoy a desision ti Korte Suprema agsipud ta mamatikami iti paglintegan a masapul a maikkan iti patas a gundaway amin a sumrek iti aniaman a rupak, salip, wenno salisal.

Iti bukodmi a panirigan, dakkel a bentahe unay kadagiti opisial iti gobierno nga agkandidato iti pabutosan a puesto ken pakaarusan unay dagiti kasangoda iti politika daytoy a pangngeddeng ti Korte Suprema.

Nupay saan nga annugoten dagiti opisial a nangato ti puestoda iti gobierno, dakkel a pangatiwanda kadagiti kasangoda iti politika agsipud ta malaksid iti pondo ti opisinada a mabalinda nga aramaten a pagkampania, maaramatda pay dagiti dadduma a resources iti opisinada tapno maatiwanda dagiti kasupangetda iti politika.

Pagarigan laengen dagiti dadduma a nangato nga opisial ti gobierno, ar-aramatenda ti nagan ti opisinada tapno mairakurakda dagiti nagapuanan ti opisinada ngem kinapudnona, agdadata dagiti infomercials a pangitandudo iti awareness dagiti tattao (botante) iti rupa ken nagan ti nasao nga opisial.

Nupay kuna dagitoy nga opisial nga awan ti kuarta a nagtaud iti pondo ti opisinada iti pannakaipatangatang dagitoy nga infomercials iti radio ken pannakaipabuyada iti telebision, gapu iti madagdagullit a pannakangeg iti nagan ken pannakakitkita dagiti tattao (botante) ti rupa dagitoy nga opisial, maimaldit ken kumpet iti panunotda ti rupa ken naganda a dakkel a pangbentaheanda kadagiti kasangoda, aglalo dagitay agkurang ti makinariada a pangirubbuat iti kandidaturada.

Yan ti imas (ken paitna), annugotentayo man wenno saan, no ania ti ideklara ti Korte Supreme, linteg dayta a narigaten a masuba.

Dayawentayo dagiti opisial a naglusulosen iti puestoda uray idi awan pay ti desision ti Korte Suprema. Adda etika dagitoy nga opisial. Ngem dagiti opisial a kasla tekka a kimpet iti puestoda gapu iti nasao a desision?

Tatta, kuna ti Comelec nga addan iti opisial no pilienna ti aglusulos no agtaray iti pabutosan a puesto gapu iti etikal a rason, nupay iti biang ti poll body, agtaltalinaed ti pagtaktakderanna a rumbeng nga aglusulos dagitoy a nadutokan nga official iti puestoda no agtarayda iti masungad nga eleksion.

Etika? Iti bukodmi a panunot, ganggannaeten dayta a balikas kadagiti opisialtayo ditoy pagilian.#