EDITORIAL: Saan a patas ti pannakatratar dagiti atleta ti pagilian

Maysa a nakaawis iti imatangtayo ti rimmuar iti maysa nga aginaldaw a pagiwarnak mainaig iti alawans a maited kadagiti atletatayo nga agsansanay para iti pannakisalipda iti Olympics a maangay iti Beijing, China inton Agosto daytoy a tawen.

Nadakamat iti nasao a damag nga ikkan ti Philippine Sports Commission ni Miguel Molina iti $3,000 (P120,000) a binulan nga alawans para iti panagsanayna iti pannakisalisalna iti linnangoyan iti Beijing Olympics.

Ni Molina, maysa a Filipino-American, ti  karimatan ti bituenna a lumalangoy a nakagun-od iti uppat a gold medal iti Southeast Asian Games a naangay itay napan a tawen iti Thailand a gapu iti nakapilianna a Best Male Athlete of the 2007 Southeast Asian Games.

Agingga ita, ibbong pay la ti pagilian no balitok a medalia iti Olympics ti pagsasaritaan. Dua a gundaway a napalusposan ti pagilian ti balitok a medalia iti boksing ket nagsaltek laeng iti silver medal.

Iti umuna a panagkita, maiyanatup laeng ti kasta kadakkel a kantidad a maited ken ni Molina ta kasapulan laeng a maited kenkuana amin a suporta ken tulong barbareng maiyalat metten ti Pilipinas ti nabayagen a tagtagainepna a balitok a medalia iti Olympics.

Ngem sabali ti SEA Games iti Olympics. Iti Olympics Games, agdudupudop ditoy dagiti kapardasan a lumalangoy manipud kadagiti nadumaduma a  pagilian ket uray ngata ipakat amin ni Molina amin a kabaelanna nga agkuy-ad, sigurado nga agabogto iti nasao a linnangoyan.

Kadakkelan laeng a magun-od ni Molina iti ipapanna iti Olympics ti pannakapadasna a makisalip iti paay-ayam a para laeng kadagiti kapardasan ken kalaingan nga umaayam iti lubong. International exposure a kunada.

Awan koma ti pakababalawan ti PSC no ikkanna iti kasta a kantidad ni Molina agsipud ta nangted iti pammadayaw iti pagilian iti napalabas a SEA Games.  Ti problema, ta saan nga agpaparis ti panangtratarna kadagiti dadduma pay nga atleta ti pagilian a makisalip iti Olympics, kas kada boksingero a Harry Tañamor, taekwondo-jins Tshomlee Go ken Marie Antoinette Rivero ken dadduma pay nga atleta a karaman iti bassit a delegasion ti Pilipinas. Kadagitoy nga atleta, maikkanda laeng iti binulan nga alawans a $500 (P20,000).

Ania koma ti pakaidumaan ni Molina kadagitoy nga atleta ti pagilian? Kinapudnona, dakdakkel pay ti namnama ti pagilian a makaala iti balitok a medalia kadakuada idinto nga agdalan ken ni Molina iti abut ti dagum no makalasat iti damo a rikus ti linnangoyan.

Saan a nakakasdaaw nga awan ti asensuan ti isports iti pagiliantayo. Iti laengen maited nga insentiboda iti panagsanayda, maarus ken maiwalwalinen dagiti puro a Filipino nga atletatayo kadagiti Filipino-American nga, akuenda man wenno saan, awan ti tsansada nga agrimat iti isports iti ganggannaet a pagilian nga agdama a pagindeganda.#