EDITORIAL: Saan amin a sagut ket nagtaud iti puso

Iti panangdaleb ni Manny “Pacman” Pacquiao ken ni Ricky Hatton iti maikadua a rikos ken panangagawna iti WBO Light Welterweight crown daytoy, saan laeng a sinemento ni Pacquiao ti reputasionna a kas pound for pound king no di pay inlugarna ti bagina a kas maysa kadagiti kalaingan a boksingero iti sangalubongan.

Ita, kas karimatan iti bituen kadagiti amin boksingero ditoy pagilian, kasla dalluyon dagiti sagut, grasia ken pammadayaw a mairukruknoy kenkuana gapu iti nagapuananna iti tay-ak ti sports. Kas iti apeliedona, arig pakiawennna aminen dagiti pammadayaw, pagimbagan ken grasia a mairuknoy iti maysa a boksingero.

Iti daytoy naudi a pannakirupakna iti ring, nasurok a P600 milion ti natgedan ni Pacquiao iti dua laeng a rikos a panagling-etna. Sabali laeng ti ginasut a milion nga awatenna iti pay per view.

Iti panaggawidna, kasla “tinapay manipud iti langit nga agtinnag dagiti pammadayaw ken grasia kenkuana.

Maysa a motorcade ti insagana dagiti mamayor ti Quezon City, Makati ken Pasay iti kampeon kas pammadayaw iti daytoy a balligina.Uray ti city government ti Manila, adda awisna ngem kas iti napalabas, linabsan laeng ni Pacman.

Iti Malakaniang, mismo a ni Presidente Gloria Macapagal-Arroyo ti nangsangaili ken ni Pacquiao iti engrande a selebrasion nga inangayna kas panangpadayawna iti Pinoy a boxing superstar.

Espesial pay ti cake nga insagut ti Malakaniang para iti boxing icon.

Sabali pay a sagut ti Presidenteti pannakaited ken ni Pacquiao iti titulo nga ambassador ti kappia ken panagkikinnaawatan “tapno kano makatulong para iti pannakaisayangkat iti natalna ken nadalus nga eleksion inton 2010.

Saan met a nagpaudi ti Department of Justice. Dinesignaran ni DOJ Secretary Raul Gonzalez ni Pacquiao nga special assistant to the secretary of justice on intelligence matters.

Kinuna pay ni Gonzalez a makikoordinar ni Pacquiao iti National Bureau of Investigation para iti pannakatungpal iti pammilinna. Segun iti sekretario, annongen ti kampeon dagiti dadduma pay a pagrebbenganna a kas ipabaklay kenkuana ti sekretario.

Saanmi a kueskuestionaran dagiti mairuknoy a pammadayaw ken ni Pacquiao agsipud ta ibilangen dagiti umili a kas numero uno nga idoloda iti tay-ak ti boksing. Ngem agaripapakami iti kaadu dagiti pammadayaw a maited kenkuana amangan no patien amin ni Pacquiao a naited dagitoy agsipud ta karbenganna gapu iti nagapuananna. Ita ta nasapa pay, iballakadmi ken ni Pacquiao a saan amin a maited a pammadayaw ken sagut ket nagtaud iti puso. Adda dagiti pammadayaw a mairuknoy kenkuana tapno maidur-as ti nakadulin nga interes ti nangited, aglalo no maysa daytoy a politiko wenno nangato nga opisial ti gobierno.

Dagitoy ti siputan ni Pacquiao tapno di magaburan kadagiti manangallilaw a pammadayaw manipud kadagiti agpampammarang a gayyem ken mangsuporta kenkuana.#