EDITORIAL: Saan koma nga agpampannuray lattan iti remittances dagiti OFW

Nadakamat iti maysa a panagadal nga insayangkat ti Congressional Planning and Budget Office ti House of Representatives a dakkel ti naitulong dagiti remittances manipud kadagiti kakailiantayo nga agtrabtrabaho iti ballasiw-taaw iti ad-adu a panaggasto dagiti pamiliada  ken iti idudur-as ti ekonomia.

Ibambando pay dagiti agtuturaytayo ti dakkel a dimmur-asan ti ekonomiatayo ket ngimmato ti balor ti piso, napabassit ti gobierno dagiti utangna kadagiti ganggannaet a pagilian ken bimmassit ti depisit ti turay.

Ngem saan a nasayaat ti nagdapagan ti ingangato ti balor ti piso kadagiti exporters agsipud ta bimmaba ti pakailakuan dagiti produkto nga ipatulodda iti ballasiw-taaw ken kadagiti pamilia nga agaw-awat iti doliar manpu kadagiti OFWs agsipud ta bimmassit ti pakaisukatan ti aw-awatenda a kuarta.

Segun iti nasao a panagadal, aganay a P8.6 bilion ti bimmassitan ti pateg dagiti kuarta nga impaw-it dagiti kakailiantayo ditoy idi Disiembre iti napalabas a tawen a nakaapektaran ditoy dagiti remittances dagiti aganay 8.3 milion a kakailiantayo nga agtrabtrabaho iti ballasiw-taaw a mapattapatta a mangsupsuporta iti 40 milion a pamiliada ditoy pagilian.

Segun iti panagadal, manamnama ti ad-adda pay nga ibabassit ti mateggedan dagiti OFW iti masakbayan agsipud iti mapattapatta nga agtuloy a panagpangato ti balor ti piso gapu iti dumakdakkel a remittances nga ipawpaw-itda kadagiti pamiliada a dakkel a nakatulong iti pannakabatir iti ekonomia ti pagilian.

Saan a mailibak nga adu latta dagiti kakailiantayo ti pumanaw iti pagilian tapno agsapulda iti ganggannaet a pagilian.

Pammaneknek daytoy a saanda a mapnek iti masapulanda ditoy pagilian ket kapilitan a mapanda mangged iti ganggannaet tapno maikkanda iti naraniag a masakbayan ti pamiliada.

Dakkel a sakripisio dayta.

Iti panagpaw-itda iti kuarta iti pamilia ditoy pagilian, namnamaenda a dakkel a makatulong daytoy iti biag dagiti pamiliada.  Ngem yan ti adatna, gapu iti idadakkel dagiti  remittances manipud kadakuada, daytoy metten ti maysa kadagiti nakatulong iti dakkel iti simmayaatan ti ekonomia ti pagilian ken nangiduron iti pisos tapno ngumatngato ti balorna a bimmassitan ti pakaisuplian ti kuarta nga ipaw-itda.

Iti sanguanan dagitoy, maidagadag ti saan koma a panagpannuray lattan ti gobierno kadagiti ipatpatulod dagiti overseas Filipino workers    tapno masustenerna ti agtultuloy a panagdur-as ti ekonomia ti pagilian.

Mangibagatayo laeng iti sumagmamano:  mangipasdek ti turay kadagiti ad-adu a panggedan,  ken aggawid kadagiti negosio ken industria a makayempleo iti dakkel a bilang dagiti agtutubo ken nababa ti adalna tapno saanda a maengganio a pumanaw iti pagilian.#