EDITORIAL: Saan a patas a pannakatratar kadagiti balud

Uppat nga aldaw a saan a nagipauneg dagiti political prisoners agingga iti panangidatag ni Presidente Benigno Aquino III dagiti nagapuananna kadagiti umili babaen ti State of the Nation Address (SONA) sadiay Batasang Pambansa itay Hulio 28.

Maysa laeng ti grupo dagiti political prisoners kadagiti sumagmamano a grupo a nangisayangkat iti panagprotesta maikontra iti administrasion Aquino gapu iti nadumaduma a rason, kangrunaan iti kontrobersial a PDAF ken DAP.

Ngem saan a rali iti kalsada ti inwayat a panagprotesta dagiti inmates a nakapupok iti Philippine National Police (PNP) Custodial Center iti Camp Crame, iti dormitorio dagiti babbai iti Taguig City jail, iti special intensive care area iti Camp Bagong Diwa, ken iti New Bilibid Prisons (NBP) no di babaen iti saanda a panagipauneg iti taraon kas panangipeksada iti pannakadismayada iti saan nga agpapatas a panangtratar ti gobierno kadagiti balud iti sapasap a pagilian.

Nariing manen ti ir-iruken dagiti balud kalpasan ti panangibilin ti Sandiganbayan ti pannakaiyalis ni Janet Lim Napoles iti Camp Bagong Diwa sadiay Taguig. Immuna a naipupok ni Napoles iti Fort Sto. Domingo iti Laguna.

Madakamat ditoy a nakadetene met ni Atty. Gigi Reyes, dati a chief of staff ni Sen. Enrile, iti dormitorio dagiti babbai ti BJMP.

Nakakustodia iti PNP General Hospital ni Enrile idinto a naipan da Sen. Jinggoy Estrada ken ni Sen. Bong Revilla, Jr. iti PNP Custodial Center iti Camp Crame.

Makipagriknakami kadagiti political prisoners iti daytoy a dida pannangan kas panangipeksada iti ir-irukenda. Karaman pay ditoyen dagiti ordinario a balud nga agan-anus kadagiti napekpek a kasla a sardinas a pagbaludan. Saan a malibak nga adu a balud ti agsagsagaba iti pagbaludan a nalag-an ti nagbasolanda, saan a kas kada Napoles ken Reyes a nupay ingget dagsen ti nakaisaklanganda, mapaliiw a maik-ikkanda iti espesial a pannakatratar.

Agpayso, kalintegan da Napoles a maibilang nga inosente agingga iti saan a mapudasdasan a nakabasolda kadagiti akusasion maikontra kadakuada. Ngem iti kadagsen ti nakaisaklanganda, rumbeng laeng a matratarda a kas kadawyan a balud.

Nasakit nga annugoten ngem mapaspasamak pay laeng agingga ita ti saan a patas a pannakatratar dagiti balud. Iti napalabas, addan dagiti babaknang a balud a naikkan iti espesial a treatment bayat ti pannakabista ti kasoda ken uray idi nakedngandan a nakabasol ket naikursongda iti pagbaludan. Dakamatentayo da Diputado Romeo Jalosjos a nabalud gapu iti panagrames iti menor de edad. Maipalagip a nagipatakder a bukodna a ‘kubol’ iti uneg ti pagbaludan nga addaan kadagiti moderno a pasilidad. Iramantayo ni dati a Gobernador ti Batangas AntonioLeviste a nakapatay gapu iti susik iti sugal. Naiwarnak pay a nawaya a makaruar iti pagbaludan tapno mapan aghapihapi iti ruar. Wenno ni Rolito Go a pimmaltog gapu laeng iti riri iti trapiko. Atiddog ti listaan ket umat-atiddog pay iti masakbayan agsipud ta addanto latta kas kadakuada a maisaklang ken maipalladaw iti pagbaludan gapu iti basolda iti linteg ti tao ken iti Dios.

Kaanonto nga agbaliw daytoy a panirigan dagiti agtuturaytayo iti gobierno?