EDITORIAL : Saanen a baro ti pammilin ni Pres. Ninoy Aquino

Immabuten iti nasurok a 1,000 dagiti natay idinto a kastoy met laengen ti bilang dagiti mapukpukaw iti flashflood a pinataud ti iduduprak ni Bagyo Sendong itay nabiit.

Iti daytoy a napasamak, itudtudo manen dagiti agtuturay ti Pagasa a yan ti basol gapu ta saanna a naipakaammo ti kapuskol ti tudo nga insangbay ti Bagyo Sendong tapno napakdaaran koma dagiti umili ket naisalakanda iti layus a nangikuyog kadagiti kaykayo, daga, bato ken pitak a nanggabor ken nangduprak kadagiti kabalbalayan a nangidateng iti didigra, aliaw, buteng ken kinadamsak kadagiti agnaed dagiti nadidigra a probinsia.

Ngem mamatikami nga adda met dakkel a nagbasolan ti lokal a gobierno ken ti nasional nga ahensia no apay a timmaud ti kastoy a nagdakkel a didigra iti Cagayan de Oro a nakatayan ti nasurok 1,000 a tattao ken nakapukawan iti mapattapatta a kasta met a bilang dagiti mapukpukaw.

Dakdakamatenmi ditoy ti illegal logging ken mining iti Cagayan de Oro, Iligan City, ken Dumaguete City. Gapu iti illegal logging ken mining, napugipog ti reserba a kabakiran ditoy a lugar nga iti kallabes ket nagbalin a dakkel a saluadda iti layus. Masaludsod: apay a napalubosan nga agminas ken agpukan kadagiti kaykayo iti pagiliantayo idinto nga ammo met dagiti agtuturaytayo ti peligro nga itden dagitoy iti nakaparsuaan?

Ita, nangbuangay ni Pres. Benigno S. Aquino iti task force a mangimbestiga iti napasamak a trahedia.

“Masapul a maammuan no sadino ti nagkurangan, sino ti nagkurang ken no kasano daytoy a pagikaruen,” kinuna ni Pres. Aquino.

Imbilin pay ti presidente ti pannakaipakat ti total log ban iti natural a kabakiran a mapapati a lablabsingen dagiti illegal nga agtartarikayo.

Kas inyunay-unay ni Pres. Aquino, kayatna a mangiparuar ti fact-finding team iti report tapno makaipakat iti aksion ti administrasionna wenno kayatna a maammuan ti resulta ti panagimbestiga iti saan nga at-atiddog ngem tallo a bulan.

Suportaranmi dagitoy nga addang ti gobierno tapno malapdan dagiti layus ken dadduma pay a didigra a pakaungawan ti biag dagiti kailiantayo ken pakadadaelan dagiti sanikua ken pamastrekan.

Kinapudnona, awanen ti baro iti daytoy a pammilin ti presidente. Addan dagiti kastoy nga umasping a pammilin uray iti kallabes. Adda laeng iti pannakaimplimentarda. Kasapulan laeng ti political will iti pannakaipakatda.

No maipakat ni Pres. Aquino dagitoy bayat ti panagtakemna, agbalin daytoy a dakkel a batonlagip kenkuana dagiti sumarsaruno a kaputotan.#