EDITORIAL: Saanen a kadaksan nga airport ti NAIA, bimmaba iti maikapat a puesto

DIMI AMMO no maragsakankami iti daytoy a damag: Saanen a kadaksan nga eropuerto ti Ninoy Aquino International Airport (NAIA). Segun iti resulta ti surbey nga insayangkat ti The Guide to Sleeping in Airports a naiposte iti www.sleepinginairports.net, bimmaba ti puesto ti Pilipinas manipud iti umuna a puesto iti napalabas a tallo a tawen, ket maikapat laengen a kadaksan nga airport iti sangalubongan.

Ti Islamabad Benzir Bhutto International Airport iti Pakistan ti kadaksan itan nga eropuerto iti lubong, maikadua ti Jeddah King Abdulaziz International Airport iti Saudi Arabia, ken maikatlo ti Kathmandu Tribhuvan International Airport iti Nepal.

Immun-una ngem daytoy, binutosan ti The Cheat Sheet ti NAIA-1 a kas kadaksan nga airport iti sangalubongan gapu iti kinabastos dagiti staff iti airport kadagiti pasahero ken ti atiddog a panaguray iti pannakaproseso dagiti dokumento ti panagbiahe.

Kuna ti Cheat Sheet a nabangon ti NAIA-1 a mang-akomodar iti innem a million laeng a pasahero ngem us-usaren ti average a 32 million dagiti pasilidad ti airport iti tinawen.

Iti sabali a bangir, inladawan ti Sleeping in Airports ti NAIA-1 a kas “laggard of Asia” ken narugit, adu unay dagiti tattao, naariwawa, nakaro ti pudotna ken awan pagtugawan ti uray kagudua dagiti agur-uray a pasahero.

Innaganan ti Sleeping in Airports dagiti eropuerto a sumarsaruno iti NAIA-1 a kadaksan nga airport ti Tashkent International Airport iti Uzbekistan; Paris Beauvais-Tille international airport iti France; Frankfurt Hahn international airport iti Germany; the Bergamo Orio al Serio iti Italy; the Berlin Tegel iti Germany; ken ti New York City La Guardia international airport iti US.

Dakkel a nakagapu iti yaalud-od ti NAIA-1 iti maikapat a puesto kas kadaksan nga eropuerto iti lubong dagiti inyussuat ti gobierno a mangpasayaat iti eropuerto ken mangpabassit iti decongestion babaen ti pannakaiyalis dagiti dadduma nga operasion iti NAIA-3.

Kas naiparuar iti website a The Cheat Sheet, napintas a damag dagiti agdama a pannakapasayaat ken renobasion iti NAIA a nakaigapuan iti bimmabaanna iti puesto manipud kadaksan nga airport iti sangalubongan.

Ala, medio makapabang-ar rikna daytoy a damag nupay saankami a kontento ti pannakaibilang ti NAIA-1 a maikapat a kadaksan nga airport iti sangalubongan.

Ad-adda koma pay a mangipakat ti gobiernotayo kadagiti wagas a mangpasayaat iti serbisiona iti NAIA-1. Ti eropuertotayo ti parupa ti pagilian iti imatang ti sangalubongan. Ditoy ti pagsangladan dagiti riniwriw a ganggannaet a pasahero nga umay agibaut iti negosio, agpallailang, wenno tumabuno kadagiti internasional a kombension, seminar, taripnong,  ket kasapulan ngarud a maited ti airport kadagiti pasahero ti kinakomportable, kinadalus, napintas a serbisio ken akomodasion tapno awan ti pamilawanda ket agsublidanto manen nga umay ditoy pagiliantayo.

Ala, agtultuloy latta koma ti gobierno a mangpasayaat pay iti NAIA-1 barbareng maikkatton iti listaan dagiti sangapulo a kadaksan nga airport iti sangalubongan.#