EDITORIAL: Sabali pay a panagsagaba?

ITAY Nobiembre 23, anibersario ti pannakapapatay ti 57Ā  a tattao a pakairamanan ti 31 a journalists iti probinsia ti Maguindanao, nangisayangkat dagiti kameng ti media ken dagiti nadumaduma a gunglo iti nadumaduma a paset ti pagilian iti vigil kas panangipakitada iti panagmaymaysada para iti pannakatunton ti hustisia kadagiti biktima tiĀ  masaker manipud iti ima dagiti nabileg a pamilia Ampatuan.

Makapaburibor iti panunot a nupay daytoy ti kadaksan a panangpapatay kadagiti inosente a tattao a pakaibilanganĀ  dagiti agirakrakurak, naginad ti panaguyas ti kaso iti baet nga adun dagiti rimmuar a saksi a nangpaneknek ti kaadda ni Andal Ampatuan iti lugar a nakapasamakan ti pammapatay.

No kastoy laeng ti kinaginadna, agbalin a dakkel a parikut dagiti pamilia dagiti biktima ti busbosenda a mangtunton iti hustisia ket ditoy ti pakaatiwanda kadagitiĀ  akusado a nalabon ti pagtaudan iti gastuenda para iti pannakasalaknibda. Iti kastoy a senario, dakkel ti posibilidad a sumagmamano kadagiti pamilia dagiti biktima ti mangidarumog iti uloda ket alimonenda ti dayawda a mangawat iti aniaman a kantidad nga itanggaya ti pamilia Ampatuan tapno agsanudda wenno ibabawidan ti darumda.

Kasta met a no agbayag ti kaso, agtalinaed a karkarawaen dagiti saksi iti masaker ti tengngedda. Ta saan a malibak nga iti baet ti kuna ti kapolisan a nakumpiskadan dagiti armas dagiti Ampatuan, adu pay dagiti nakadulin ken ikut dagitoy nga aramatenda a pangisaknap iti buteng kadagiti pamilia dagiti biktima ken dagiti saksi. Maysa a saksi, ni Suwaid Uphan ti napapatay idi Hunio kalpasan nga inannugotna nga isu ti maysa kadagiti nangpapatay kadagiti biktima ken nanginagan pay kadagiti dadduma a kakaduada. Posible nga addanto pay sumaruno kenkuana.

Idagadagmi ti naparpardas a pannakausig dagiti akusado tapno maikkan iti hustisia dagiti biktima a nagsagrap iti nadamsak nga ipapatay.

Maaramid laeng dayta babaen ti pannakaiparang iti telebision ti court hearing tapno maimatangan a mismo dagiti umili ken ti sibubukel a lubong no kasano a matunton ti hustisia kadagiti nabibileg a tattao a pakaibilangan dagiti Ampatuan.

Maysa a masiripmi a di paguyasan ti kaso dagiti ipakat dagiti de kalibre nga abogado dagiti Ampatuan a delaying tactics ken teknikalidad tapno mapakapsutda dagiti ebidensia a mangilidding kadagiti klienteda. Naunday a panawen a pannagna ti kaso ti ul-ullomen dagiti kameng ti depensa dagiti Ampatuan nga agtungpal iti dakkel a pakabentaanda.

Nakaron a nagsagaba dagiti pamilia dagiti biktima ti masaker iti nadamsak nga ipupusay dagiti ipatpategda, ket saan koma a karaman ti korte a mangparaba iti sugatda babaen ti nakaginginad a pannagna ti kaso maikontra kadagiti Ampatuan.#