Footer

EDITORIAL: Sabsabali itan dagiti agtuturay

Itay nabiit, naawis ti imatangmi iti maysa a damag a nakailanadan ti pannakairuar ti maysa a nakonbiktar a baluditi siudad ti Tarlac tapno laeng makideyt iti maysa a konsehal a babai.

Ditoy laeng Pilipinas ti pakapasamakan ti kastoy a damag.

Segun iti damag, mapapati a kiniddaw ni Konsehal Ana G. Aguas ti Tarlac City ti panangiruar dagiti guardia ken ni balud a Horacio Garces tapno mangrabiida a dua iti maysa a restaurant. Nairuar ni Garces babaen ti pambar a mapan agpadoktor iti Tarlac Provincial Hospital ngem iti Rustica Restaurant a pagur-urayan ni Aguas ti nangipanan dagiti polis kenkuana.

Saan koma a naammuan ti publiko daytoy no saan a nagsuspetsa dagiti sabali a polis no apay nga adda ni Garces iti ruar a kalanglang ti maysa a konsehala idinto nga adda koma iti pagbaludan.

Dimmanonen iti imatang ti dadaulo ti DILG daytoy a napasamak ket imbilinnan ti pannakaiwayat ti inbestigasion iti kinapudno ti report.

Daytoy ti maysa a pammaneknek nga adda dagiti agtuturay a saanda nga ammo ti pagtaktakderanda ken impalladawdan ti delikadesada gapu laeng iti kabukbukodanda nga interes ken pagimbagan. Agasem, mairuar lattan ti maysa a balud tapno kalanglang iti pangrabii ti maysa nga agtuturay? Maysa daytoy a panagabuso iti bileg a naikawes iti pagannongan daytoy nga agturay. Saan a nakapapati a dina ammo wenno maamiris ti dakes nga imahe a parnuayen ti inaramidna iti imatang ti kagimongan ken kadagiti nangibutos kenkuana ken iti mata ti sabali a pagilian.

Ngem sabsabali itan (sapay koma ta nagbidduttayo) dagiti agtuturaytayo. Saanen a kas idi a kapatgan kadakuada ti dayawda ta daytoy ti rupada iti kagimongan. Adun dagiti awanan iti etika, delikadesa, ken palabra de honor. Adun kadakuada ti simrek iti politika wenno agannong iti nangato a puesto, saan a tapno agserbi kadagiti umili no di tapno mapagtalinaed ken masalaknibanda ti bileg ken kinabaknangda. Adda man dagiti maipaayda kadagiti kailianda ngem sangkaballing laeng, ad-adu nga amang ti akuyenda nga ikabilda iti bulsada.

Daytoy ti mapaliiw a kadakkelan a gapu no apay a bimmaba ti panagkita dagiti  umili kadagiti opisial ken agtuturay, nangruna dagiti politiko.

Kasapulan ti pannakaiwayat iti naun-uneg nga inbestigasion mainaig iti daytoy a damag a nakainbolbaran ti maysa a konsehala ken balud babaen ti pannakikontsabo dagiti guardia ken warden ket mapakatanda iti pannusa. Iti daytoy laeng a wagas a maipatalged ti gobierno aglalo daytoy agministrasion a sinsero iti panangipakatna kadagiti reporma iti gobierno ken panangpugipogna kadagiti anomalia ken panagabuso dagiti agtuturay iti naikawes a annongenda.

Masipsiputan ngarud dagiti sumaruno nga addang ti DILG mainaig iti daytoy nakababain nga aramid a sabali pay a pangliblibbian dagiti sabali a nasion iti pagilian.#