EDITORIAL: Saganaantayo dagiti panagpipinnadakes iti politika

Maysa a pilosopo ti nagkuna a napeggad ti bassit a pannakaammo mainaig iti maysa a banag. Mabalin daytoy a pakadadaelan iti kinatao wenno mangrabngis iti dayaw iti maysa a tao wenno lugar.

Saan koma a maumsi ti maysa a tao no nababa ti nagaw-atna nga adal wenno sursuro wenno nakisang ken limitado ti pannakaammona ket dina magaw-at ti naun-uneg a kaipapanan ti maysa nga isyo wenno kapanunotan a maisaang iti sanguananna wenno makiddaw nga ikkanna iti panangilawlawag. Ngamin, kas nadakamaten, nababa ti adalna, wenno nakapsut ti pannakaawatna ket kasapulanna ti pannaranay wenno panangilawlawag tapno magaw-atna ti pagdapagan wenno naan-anay a kaipapanan ti maysa nga isyo wenno kapanunotan.

Ngem iti biangmi, saan a mabalin nga ibarengbareng lattan ti pananggundaway dagiti makuna a mamasirib, nangato ti adalda, namirit dagiti diplomada, ken matangtangad wenno mararaemda iti kagimongan wenno iti tay-ak a paggargarawanda kadagiti nababa ti adalna ken nakurang ti pannakaammoda nga umili ket lintegenda ti killo ken kiluenda ti nalinteg tapno maulaw dagitoy ken mailemmengda ti kinapudno.

Masaomi ditoy ta adda dagiti napaliiwmi a pannakagundaway dagiti babassitan nga umili a gapu ta nababa laeng ti naragpatda nga adal, maipelpel kadakuada dagiti impormasion a saan laeng a mangballikog iti kinapudno no di pay mangitag-ay iti nalimed ken kabukbukodan nga interes ken pagimbagan dagiti agtuturay, nangruna dagiti addaan tarigagay nga agtugaw iti nangato a posision.

Kas dagiti naibutaktak nga anomalia a nakaisangkotan dagiti agtuturay ken pati dagiti madaydayaw nga agilinlinteg. Iti baet a ginabsuon dagiti maidatag nga ebidensia a mangpaneknek iti pannakainbolbarda iti anomalia, ibandoda a sitatangsit a nadalus ti ima ken konsensiada, ket awan ti kinurimesda uray siping kadagiti proyekto ti gobierno a pagnam-ayan koma dagiti umili ngem simrek laeng iti bulsada. Imbes nga ipalawagda no napanan ti pondo a naibusbos para iti proyekto, iwarnakda a sipapalangguad a nagserbida a sipupudno ken dida pulos kimmaut iti kaban ti gobierno. Irakurakda a gapu ta addada iti kasupanget a partido, biktimada iti harassment ken panangirurumen manipud iti administrasion. Wenno saan, ibagada a sanguenda dagiti mangak-akusar kadakuada ken sungbatanda dagiti alegasion maikontra kadakuada iti umisu ken maikanatad a lugar.

Ngem iti kinapudnona, kayatda laeng a maipasuli dagiti alegasion ken akusasion agingga iti mauma dagiti tattao ken malipatanda. Ngamin, patienda nga ababa ti kordon ti lagip dagiti umili, nangruna dagiti adda iti nababa a tukad ti kagimongan.

Ngarud, saganaantayo dagiti masungad a bulan apaman a maammuan dagiti talaga a kandidato para kadagiti nadumaduma a posision iti man nasional wenno iti lokal.

Kinapudnona, nangrugin a mangegtayo dagiti pammadpadakes a naibato kadagiti kandidato, nangruna no madlaw a nabanglo dagitoy kadagiti botante. Nangrugin iti panagkutkot kadagiti buyok a naitanem iti tukot, dagiti agal-alingasaw a palimed iti napalabas, dagiti naaramid a babak wenno biddut ket agbalindanto nga instrumento a pangperdi iti kinatao ken dayaw ti kasupangetda a politiko.

Narugit ti politika. Uray nalintegka a tao, pagbalinendaka a killo; uray killoka nga agmamata, pagbalinendaka a nalinteg, nadaldalus pay ngem santo.
Iti nakristianuan a panagbiag, saan a maiparbeng a makillo ti killo, ken malinteg ti nalinteg. Ngem kasta ti kinarugit ti politika.

Masaludsod: apay ngarud a kasla tekka ni politiko a kumpet iti puestona? Apay a pagpipinnatayan ti puesto, uray dagiti agkakabsat?

Adda kenka ti sungbat iti dayta a saludsod, kailian!