EDITORIAL: Siit iti Kredibilidad ti Presidente

Nupay saan nga imbatad dagiti obispo ti ninamnama dagiti komonkontra iti gobierno ti panaglusulos ni Pres. Arroyo, makailap dagiti balikasda a nangkondenar iti “agtultuloy a kultura ti korapsion manipud iti ngato agingga iti lansad ti sosial ken politikal nga agdan”.

Indagadag pay dagiti obispo ti panangiwalin ni Pres. Arroyo iti Executive Order No. 464 (Winaswasen ni Pres. Arroyo ti EO 464 ket imbilinnan kadagiti opisial ti turay a dumatagda iti Senado no maayabanda. – Editor) tapno mapalubosan dagiti nangangato nga opisial ti gobierno nga agtestigo iti Senado tapno maammuan ti kinapudno mainaig iti mapapati nga overpriced a national broadband deal iti nagbaetan ti gobierno ken ti ZTE Corp., maysa a kompania iti China.

Rebbengna a tungpalen ni Pres. Arroyo daytoy a dawat dagiti obispo tapno maikkaten dagiti alegasion a kalkalubanna ti naikulapol nga anomalia iti broadband deal gapu iti pannakaiparit kadagiti opisial iti gabinetena a sumango iti Senado tapno sungbatanda dagiti saludsod mainaig iti nasao a proyekto a puon ita dagiti agsasaruno a protesta iti kalsada.

Ibagbaga ni Pres. Arroyo ken dagiti kameng ti gabinetena nga awan ti anomalia a nairagpin iti nasao a proyekto ket no agpayso dayta, apay a dina ibaon dagiti maseknan nga opisial, nangruna ken ni Romulo Neri, tapno nawayada a mangilawlawag no ania ti pudno?

Babaen ti EO 464, awan ti makita a nalawag a pagtungedan dagiti naisayangkat a hearing iti Senado, ket agingga iti awan ti paglawagan dagiti alegasion iti anomalia iti nasao a proyekto, saan a malapdan ti iseserren dagiti nadumaduma a pampanunot ken suspetsa nga adda la ketdi kalkaluban ti Presidente nga ad-adda a mangibaba iti kredibilidad ti agdama nga administrasion.

Itay Pebrero 25, naangay ti kadakkelan pay laeng a rali dagiti nadumaduma a grupo a nangkondenar iti mapapati nga anomalia mainaig iti ZTE deal.

Manamnama nga addanto pay dagiti sumarsaruno a rali wenno protesta maikontra iti gobierno. No agtultuloy dagitoy, ti met laeng gobierno ti pagballatekan ti saan a natalingenngen a kasasaad iti politika iti pagilian ket agsagrap la ketdi ti ekonomia a kuna ti turay a dumurdur-as agsipud ta umad-adu dagiti negosiante nga agibaut iti puonanda iti pagilian. No saan a natalingenngen ti atmospera ti politika iti pagilian, agpanaw la ketdi dagiti negosiante, agsarimadeng dagiti agplanplano nga agibaut iti negosio iti pagilian.

Saan la ketdi a kayat ti agdama a turay a mapasamak dayta.

No sinsero ti turay a lumtuad ti kinapudno mainaig iti broadband deal, tungpalenna ti dawat dagiti obispo: ibaonnan ni Neri a sumango kadagiti senador tapno maikkaten daytoy a siit iti kinatalingenngen ti pagilian ken kredibilidad ti Presidente ken ti pamiliana.