EDITORIAL: Sinseridad ti kasapulan para natalna, naurnos ken nadalus ti eleksion

Idi Disiembre 17, nagtitipon dagiti kandidato nga agtaray iti nadumaduma a posision iti probinsia para iti pannakapirma iti peace covenant para iti natalna, naurnos ken nadalus nga eleksion.

Dimmar-ay ditoy dagiti agdama a nakatugaw nga agtaray manen iti puestoda, dagiti kabarbaro ken agngayangay manen a pabutosan iti puesto.

Kalpasan ti misa a naangay iti nadaeg nga altar ni San Pablo, nagpirma dagiti madaydayaw a kandidato iti katulagan ti kappia.

Ngem nakaladladingit ta awan ti nakita a naikappeng iti oposision a timmabuno iti daytoy a gannuat nga initiatibo ti PPRCVB, Namfrel, Comelec, PNP ken AFP para iti nadalus, naurnos ken natalna nga eleksion.

Iti umuna a panagkita, sumngay iti panunot a saan a kayat dagiti kameng ti oposision a maisayangkat ti nadalus, naurnos ken natalna nga eleksion. Ta no kayatda koma, apay a dida man la timmammidaw uray apagbiit iti nasao nga okasion tapno mapatapat ti nasinged a langenlangen iti nagbabaetanda a politiko ken maikarida (iti sanguanan ti altar) a saanda nga agbalin nga instrumento iti narugit, nadamsak ken nariribuk nga eleksion.

Ngem iti dida itatabuno, nagbalin laeng a one-sided ti nasao a peace covenant. Iti aniaman a pasalip ken panagsasalisal, no saan a nagparang ti makisalip, kaawatan nga iyawatnan a kasla mama ti balligi iti kasupadina wenno kasalipna iti pammadayaw. Forfeited a kuna. Ket kayat man wenno saan ti publiko, maital-o ti ima ti nabati a nakatakder (uray awan simmango) ket maiyawat kenkuana ti pammadayaw.

Kasta kadi ti kayat dagiti kameng ti oposision isu a saanda a nagparang? Iyawatda lattan ti korona a di man la nangeg ti bassit nga areng-engda?

Ngem mabalin nga adda naun-uneg a rason no apay a dida timmabuno. Adda sumagmamano a masiripmi a gapu no apay a kinaykayatda lattan ti agpaigid.

Umuna, kapaliiwan iti napalabas nga eleksion nga ad-adda a nangarus dagiti kandidato nga adu ti kuartana. Uray kasano panangibalballaag ti Comelec ti pannakadusa dagiti kandidato a mangted iti kuarta kadagiti botante, ken panangipalpalagip ti simbaan ti saan a panangibutos kadagiti kandidato nga agpasuksok, saan a maitaltalek daytoy a pammilin. Iti bisperas ti eleksion, agdakiwas dagiti bataan dagiti kandidato ket karadapenda dagiti botante nga agwaliwali pay laeng ti panunotda tapno masigurado nga isuda ti maibutos. Saantayon nga ibinsabinsa pay no ania ti aramidenda. Ammo dagiti tattao, nangruna dagiti awan kuartana a kandidato a nabileg ti pirak a pangbalbaliw iti kapanunotan dagiti botante.

Adu pay dagiti wagas nga aramaten ti kandidato tapno “maallukoyna” ti botante. No saan a maala daytoy iti nalamuyot a wagas, sumublat nga agkuti dagiti pasurot ti kandidato. Saantayo metten a dakamaten pay no ania dagiti panglakaganda tapno mapagwenda ti botante uray sumugkar ti riknana.

Iti papel, napintas ti peace covenant. Nabileg daytoy nga instrumento ti nadalus, natalna ken naurnos nga eleksion.

Ngem kas nasaomin, kasapulan ti dua a partido nga agtungpal iti katulagan. Ti rigatna kadagiti kaadduan a kandidato, nangruna dagiti nakatugaw, saanda a sinsero a mangsurot iti pinirmaanda akatulagan. Maysa laeng ti katulagan a sangkapirgis a papel a mabalinda latta nga iwalin no makalapped daytoy iti panagballigida iti eleksion.#