EDITORIAL: Suportarantayo ti House Bill 621

Maysa a gakat a naipila iti Kamara ti kasapulan a suportaran saan laeng dagiti agtrabtrabaho iti gobierno no di pay ti pribado a sektor aglalo dagiti dandanin agretiro iti serbisio.

Daytoy ti House Bill 621 nga impila ni Diputado ti Aurora province Juan Edgardo Angara. No maaprobaran daytoy a gakat, dakkel a pakabang-aran dagiti agretiro iti pribado ken gobierno agsipud ta saandan nga aguray iti mabayag sada maawat dagiti benepisioda nga agretiro.

Iti daytoy a gakat ni Diputado Angara, itudingna ti madagdagus a pannakaited ti retirement benefits ti maysa nga empleado iti las-ud ti makabulan laeng kalpasan ti pannakadanonna iti tawen a panagretirona.

Ngamin, kapaliiwan a no nagipila ti maysa nga empledo iti panagretirona, aguray iti adu a bulan wenno matawenan pay sananto maawat dagiti benepisio ti panagretirona.

Adda pay dagiti nagretiro a saanda pulos a nasagrap ti bunga ti pinullo a tawen a panagserbida agsipud ta  pimmusayda a di pay naaprobaran dagiti benepisio ti panagretiroda.

Kinuna ni Angara nga impilana ti nasao a gakat agsipud ta ammona ti nagdalanan ti empleado a sakripisio ken nagarubos a ling-etna iti panagtrabahona iti no mano a tawen sakbay a sagrapenna ti bunga dagitoy a panagsakripisiona.

Innayon pay ti diputado dagiti naidanon iti opisinana a panagpatulong dagiti nagretiro gapu iti rigatda a mangsurot iti retirement papersda iti Government Service and Insurance System wenno iti Social Security System a kaadduanna a mataktak wenno maitantan agsipud iti panagliway ti opisina wenno employerda.

No apay ketdi a saan a maited a dagus ti retirement benefits dagiti empleado, iti man pribado a sektor wenno iti gobierno ket kasapulan pay nga aggudaudda ken agsublisubli iti GSIS wenno iti SSS idinto a rebbengna koma a maruk-atan a dagus dagiti benepisioda apaman nga agretiroda.

Saan a malibak a manipud iti kinaagtutubona agingga iti dandanin likudanna ti langit nga impaay ti empleado ti pigsa ken nadarisay a panagserbina ket rumbeng laeng nga iti panagretirona, dagus a maited kenkuana dagiti benepisio ti panagretirona tapno nanamenna ti bunga dagiti panagsakripisiona.

Dakkel a pakabang-aran ti agretiro ti pannakaammona a maited a dagus dagiti retirement benefitsna agsipud ta iti isisinana iti serbisio, saanton nga agsueldo pay ket saan nga agbalin a dakkel a problema nga ibaklayna ti pangsarakuyna iti panagbiagna, aglalo no awan ti urnongna agsipud iti nababa a sueldona.

Ngarud, rumbeng laeng a suportaran amin a mangmangged daytoy a gakat ni Diputado Angara.

Idagadagmi ngarud kadagiti amin a mangmangged ti panangsuratda kadagiti diputadoda ken dagiti senador iti panangputarda iti kaaspingna a gakat para iti dagus a pannakaaprobarda. #