EDITORIAL: Sur-ay kadagiti lokal a gobierno

Imbilin itay nabiit ti Malacañang iti Department of Finance iti panangadalna iti singasing ni Secretary Ricardo Saludo a panangilatang ti Bureau of Customs iti 40 porsiento iti koleksionna iti Value Added Tax kadagiti tagilako a maangkat iti ganggannaet a pagilian nga para kadagiti local government units.

Dakkel a pakagin-awaan dagiti lokal a gobierno no maibingayanda iti nasao a koleksion iti VAT kadagiti merchandise a sumrek iti pagilian manipud iti ganggannaet nangruna iti pannakaital-o ti ekonomia ti probinsia ken ilida.

Ta saan a palimed nga adu dagiti probinsia ken il-ili ti nakurapay ken nakirang ti pamastrekanda ket agdepdependeda laeng iti internal revenue allotment nga it-ited ti nasional a gobierno.

Itay napan a tawen, imbando ti gobierno a dimmakkel ti ekonomia ti pagilian iti 7.3 porsiento a kunana a kangatuan pay laeng iti las-ud ti 31 a tawen.

Iti daytoy a situasion, rebbengna laeng a tulongan ti nasional a gobierno dagiti probinsia ken il-ili yantangay dakkel ti simmayaatan ti ekonomia ti pagilian gapu kadagiti reporma iti buis nga impakatna kas iti VAT.

No adda man kasayaatan a pagtariktikan iti dimmur-as nga ekonomia ti pagilian, awan sabali no dagiti lokal a gobierno agsipud ta isuda ti kaepektibuan a mangipaay iti nasaysayaat ken napimpintek a serbisio kadagiti iturayanda nga umili iti probinsia ken ilida. Saan a ti nasional a gobierno ti kangrunaan nga umasitgan dagiti umili para kadagiti kasapulanda iti inaldaw-aldaw a panagbiagda no saan a dagiti lokal nga opisial a mangituray kadakuada.

Kinapudnona, iti baet ti makunkuna a panagdur-as ti ekonomia ti pagilian, saan a marikna daytoy dagiti ordinario nga umili agsipud ta awan met ti makitada a pagbaliwan iti panagbiagda – kaskasdi a nababa ti mateggedanda iti baet a ngumatngato ti presio dagiti magatgatang.

Paneknekan daytoy ti report manipud iti National Statistics Coordination Board a nagkunaanna nga immadu dagiti marigrigat nga umili iti pagilian.

Idi 2003, segun iti NSCB, agdagup iti 23.8 milion ti insidente ti kinakurapay iti pagilian ngem itan, dimmakkel iti 27.8 milion iti baet a ngimmato iti 5.4 porsiento ti average economic growth ti pagilian manipud idi 2004 agingga iti 2006.

Makunami: No pudno met laeng a dumurdur-as ti ekonomia ti pagilian, panawenen ken rebbengna a tulongan ti nasional a gobierno dagiti lokal a gobierno a mangsur-ay iti ekonomiada tapno sumaysayaat ti maitedda a serbisio kadagiti umili iti lugarda.

Kasapulan ditoy ti aksion, saan a panangadal laeng.#