EDITORIAL: System loss, padagsen dagiti agar-aramat ti koriente

Segun dagiti madaydayaw nga opisial ti Ilocos Sur Electric Cooperative, puminpintas ti serbisio nga ipapaayda kadagiti consumer-members. Iti baet daytoy, agparparang a dakkel latta ti system loss ti kooperatiba ti elektrika agingga ita.

Ania ngamin daytoy system loss a makuna? Segun iti panangipalawag dagiti opisial ti kooperatiba, daytoy ti mapukaw iti panagtaray ti koriente kadagiti linia agingga kadagiti pagtaengan wenno kadagiti pasdek nga agar-aramat iti koriente.

Adda daydi panawen, segun iti maysa a report manipud kadagiti opisial ti ISECO nga immabut iti nakurang a P20 milion ti napukaw gapu iti average system loss a 16.2191%.

Iti maysa a presscon nga inangay idi dagiti opisial ti ISECO a  nangilawlawaganda kadagiti isyo mainaig iti power purchase adjustment ken iti petisionda a mangingato iti singir ti koriente, inannugotda a problema ti system loss nga ibakbaklay ti kooperatiba isut gapuna nga intuyang ti National Electrification Administration ti cap iti system loss iti 14% .

Ngem apay a saan a maipabassit iti nababbaba pay ti system loss iti baet ti nainget a panangsiput ti ISECO kadagiti agtaktakaw iti koriente ken agtultuloy a panangpasayaatna kadagiti linia a pagtarayan ti koriente a dumanon kadagiti kabalbalayan?

Apay a dakkel latta ti system loss iti baet nga impadpadayaw pay dagiti opisial dagiti nagapuananda para iti pannakapasayaat ti operasion ti kooperatiba ken ti serbisiona para kadagiti consumer-members?

Ania dagiti kangrunaan a gapu iti system loss?

Umuna, daan dagiti linia, adu dagiti pasetda a nalukaisan, putedputed ken dandani mapugsat dagiti barut, ngarud kimpetan ti tapok ken lati ket uray bassit la a tudo, dagitoy ti pakaigapuan ti panagpukaw ti koriente.

Maikadua, adu dagiti agtaktakaw iti koriente.

Maikatlo, depektibo dagiti kuntador. Adda sumsumbrek nga elektrisidad kadagiti pagtaengan wenno pasdek ngem saan met nga agrehistro iti kontador.

Kasapulan ngarud ti naing-inget a panagtignay dagiti opisial tapno mapukaw wenno mapabassit ti system loss. Kangrunaan a siputanda ti pilferage ti koriente a dakkel a pagpukawan ti kooperatiba. No adda man maduktalan nga agsuitsuitik ken agtaktakaw iti koriente, dida koma agkitakit a mangipakat iti pannusa kas ituyang ti paglintegan. Masapul nga ipakita dagiti opisial nga awan ti idaddaddumada kadagiti consumer-members wenno nalukneng unay iti panangtratarna kadagiti naglabsing.

Lagipen koma dagiti opisial ti kooperatiba a ti problema ti system loss ket problema met dagiti consumer-members agsipud ta karamanda a mangibaklay iti daytoy.#