EDITORIAL: Tapno masigurado ti panagballigi ti gannuat

Inaprobaranen ti sangguniang panlalawigan ti Executive Order ni Gov. Deogracias Victor Savellano para iti pannakaipasdek ti Botika ti Probinsia.

Iti pannakaanamongna iti legislative body, awanen ti sawir iti pannakaipasdek ti nasao a botika a kas economic enterprise ti gobierno probinsial a mangipababa iti presio ti medisina para kadagiti district hospitals iti probinsia a pakairamanan ti Gabriela Silang General Hospital.

Napintas daytoy a gannuat a naitulad iti Botika ng Lalawigan ti probinsia ti Cavite. Ta saan a mailibak a nanginngina dagiti agas a mailaklako kadagiti district hospitals ngem kadagiti agas a mailaklako iti pribado a parmasiutika iti ruar. Babaen ti pannakaipasdek ti botika ti probinsia, nalaklakanton dagiti agas a pakabenepisiaran dagiti marigrigat a pasiente.

Kas naukkonmi kadagiti rakurak ken interbio dagiti opisial ti probinsia, iti botika nga imatonan ti probinsia ti gumatangan dagiti district hospitals kadagiti agas. Agsipud ta ti mismo a botika ti probinsia ti deretso a maki-transact kadagiti kompania ti agas, magatangna dagitoy iti nalaklaka a presio. Ngarud, gumanansia ti botika ken matulonganna pay dagiti district hospitals agsipud ta nalaka ti presio a pangilakuanna kadagitoy nga agas.

Kasta ti kasimplena.

Kas panagsagana dagiti dodoktor, naibaonda nga agobserba iti Cavite mainaig iti naipasdek ditoy a Botika ng Lalawigan; naisayangkat dagiti nadumaduma a miting a nakaawisan dagiti hepe dagiti district hospitals ken naawis mismo dagiti taga-Cavite a nagilawlawag kadagiti addang nga impakatda idi irubbuatda ti nasao a proyekto.

Ngem iti bukodmi a biang, saan nga umdas dagitoy.

Malaksid nga awan pay ti naidatag a feasibility study mainaig ti botika ti probinsia kas economic enterprise (iti Cavite, inruar ti gobernador ti executive order kalpasan ti pannakaidatag ti feasibility study), adda dagiti banag a kasapulan ti pannakailawlawag a nalaing mainaig iti operasion daytoy, kas iti pangrugianna a puonan, kasano ti pannakaipatarayna (agsueldo kadi ti mangimaton iti botika, agraman dagiti kameng ti board?), no papanan dagiti maganansia (maipan iti maysa a trust fund a pangtulong iti operasion dagiti district hospitals wenno iti kaha ti gobierno wenno agbalin a kooperatiba nga addanto dibidendo a pagbibingayan dagiti agbalin a miembro?), kasano a mapagbalin met dagiti district hospitals nga economic enterprise ti panaggatangda iti agas iti nasao a botika ken ti legal nga aspeto mainaig iti bidding ken transaksion kadagiti kompania dagiti agas.

Ita, inaprobaranen ti sangguniang panlalawigan ti executive order para iti pannakaipasdek ti nasao a botika iti baet ti kaadda dagiti banag a saan pay unay a maawatan dagiti dodoktor ken uray siguro dagiti kameng ti provincial board. Iti nanumo met a kapanunotanmi, kayarigan daytoy ti pannakaited iti pammalubos iti maysa a bus nga agrubbuaten idinto a saan pay unay a napairutan dagiti tornilio dagiti pilid ti lugan.

Kas nakunamin iti ngato, napintas daytoy a gannuat ti gobierno probinsial. Rumbeng laeng a maipasdek ti maysa a botika a makaited iti nalaklaka nga agas kadagiti pasiente, nangruna unay kadagiti kailiantayo a marigrigat .

Ngem saan ngata a nasaysayaat a maiplastar amin a banag mainaig iti operasion ti nasao a botika tapno maplansa amin a panagduadua ken reserbasion ket masigurado ti panagballigina ken awanto ti panagtitinnudo iti pammabasol a makaapekto iti pannakaipaay iti napimpintas a serbisio ti salun-at kadagiti umili nangnangruna dagiti marigrigat a pasiente?#