EDITORIAL: Tapno Matuntonanda ti Hustisia

Itay nabiit, pinalagipan ti Public Attorney’s Office (PAO) ti opisina ti provincial prosecutor iti maysa a probinsia iti Nagtengnga a Luzon ti saanda a panang-require kadagiti indigent nga umili nga agbayad iti fee no agipilada iti kaso.

Segun iti nasao nga opisial ti PAO, adda memorandum circular a naggapu iti Department of Justice a mangibilbilin kadagiti amin a city ken provincial prosecutors nga exempted dagiti indigent a complainants nga agbayad iti fees para iti panagipilada iti kaso.

Nagramut daytoy a tignay ti PAO gapu iti report ti maysa nga abogadoda nga adda sumagmamano a provincial prosecutors a saan a sumursurot iti nasao a memorandum circular ti DOJ.

Ti PAO ti kangrunaan nga opisina ti gobierno a mangipapaay iti libre a legal a tulong kadagiti marigrigat nga umili kadagiti kaso a kriminal, sibil ken uray maipapan iti trabaho, administratibo ken dadduma pay a kaso.

Kas intuding ti R.A. 9406, entitled dagiti marigrigat nga umili a kliente ti ahensia iti exemption nga agbayad iti docket fee ken sabsabali pay a bayad nga adda pakainaiganna iti panagipilada iti kaso iti korte wenno sabali pay a quasi-judicial bodies.

No naikkanen ti litigante iti sertipiko manipud iti PAO a maysa nga indigent, mabalindan ti agipila iti kaso nga awan ti bayadanda a docket fees, segun pay iti Memorandum Circular No. 18 series of 2000 ti PAO.

Suportaranmi daytoy nga addang ti PAO agsipud ta mamatikami a rumbeng a maikkan amin dagiti tattao, nangruna dagiti marigrigat iti patas a pannakaipakat iti hustisia.

Saan a mailibak nga adu a marigrigat a nailidding dagiti kalinteganda ket kayatda ti kumamang iti korte tapno maikkan iti maitutop a pannusa dagiti nangrabngis iti kalinteganda.

Ngem kasapulanda ti kuarta a pagbayad iti abogado tapno agkuti ti ipilada a kaso tapno matuntonanna ti hustisia. Daytoy ti naipaakem iti PAO, ti mangited iti libre a serbisio kadagiti indigent a litigante.

Saan a mailibak a gapu iti kadakkel ti magastos ti litigant no agipila iti kaso iti korte, adu a marigrigat ti agsanud piman wenno siulimekda lattan a sagabaen ti pannakaidadanes ti kalintegan ken dayawda. Saan met a mailibak nga adda latta dagiti di agpangadua a mangrabngis iti kalintegan dagiti babassitan agsipud ta adda kuartada a pagbayadda iti dekalibre nga abogado a mangdepensa kadakuada no adda kaso a maisaklang maikontra kadakuada iti korte.

Agdadata a bangking ti hustisia. Ket masansan a daytoy ti kangrunaan a gapu a mangiduron iti marigrigat a kumpet iti uray patadem tapno maikkan iti hustisia nga agtungpal iti ad-adda pay a pakaisagmakanna.

Rumbeng laeng a sumurot dagiti provincial prosecutors iti pammilin ti DOJ a dida pagbayaden dagiti indigent litigants iti docket fees no agipilada iti kaso.

Saanda koma a pespesen dagiti marigrigat iti panangtuntonda iti hustisia. Makurkurangan la ngaruden dagitoy iti pinansial a kasapulan, di maikanatad a maipaidam pay kadakuada ti kalinteganda a maikkan iti naan-anay a hustisia.#