EDITORIAL: Tenkyu, Titser!

Dagiti titser ti makunkuna a mitsa ti progresibo a panagbalbaliw, gapu ta isuda ti mangmuli kadagiti ubbing ken agtutubo iti nasayaat nga adal ken sursuro sakbay nga umadak dagitoy iti nalawlawa pay a kabangkagan ti biag. Naipalay kadagiti dakulapda ti masakbayan dagiti ubbing ken agtutubo ta isuda ti mangig-iggem iti narangrang a silaw ii naraniag a masakbayan. Asinoman nga agtalek ken sidadaaan a paisuro ken paiwanwan kadakuada ket maaddaanda iti makapnek a pagbanagan iti masakbayan.

Isu nga awan ngatan ti sabali pay a propesion ket takder iti biag a nataktakneng ngem itoy, a maaw-awagan pay iti maikadua a nagannak. Kas maikadua a nagannak, obligasionda a mulien dagiti ubbing ken agtutubo iti nasayaat a sursuro ken makapnek nga adal; saan laeng nga awag ti propesion ti manggutugot kadakuada nga agserbi no di ket addaanda iti talugading a passion iti panagisuro, dedikasion a mangmuli, ken mangidana, iti naiduma a sakripisio a mangtarabay iti umno a dalan ti biag.

Katan-okan a propesion, kunami, saanmi a linaksid dagiti dadduma a passionate met iti trabahoda kas kadagiti soldado ken dadduma pay a propesion. Isuna laeng ta sakbay a nagteng dagita a dadduma a propesion ken kasasaadda iti biag, nagdalanda nga immuna iti pannursuro ken pannarabay dagiti titser. Saan kadi? Ti kaunaan a mannursuro, ket dagiti mismo met laeng a nagannak, manipud pay maladaga; ket idin ta sidadaandan a sumagepsep iti nangatngato nga adal ken sursuro, inako daytan dagiti titser dayta nga akem; dagiti nagannak intalekdan kadagiti titser dagiti annakda, isu a naawaganda iti maikadua a nagannak.

Kas panangbigbig iti dinto masubadan a sakripisioda, dedikasion ken ayatda iti panagbalbaliw tunggal indibidual nga agturong iti naraniag a masakbayan ken iti naprogresibo a gimong, naidaton ngarud kadakuada ti makabulan a selebrasion, ti National Teachers’ Month, a nangrugi manipud Setiembre 5 agingga iti Oktubre 5, ken paneknekan dayta iti Proclamation No. 242 a pinirmaan ni Presidente Benigno Simeon Aquino III. Rumbeng laeng a maited ti subad iti kinatan-ok nga aramid ken gapuananda.

Iti daytoy makabulan a selebrasion nga agpaay kadagiti amin a titser, maidaton kadakuada ti naimpusuan a panagyaman, ket  makikaykaysakami a mangiyebkas iti: “Tenkyu, titser!” (JMAJr.)