EDITORIAL: Ti Boss dagiti “Bosses”

Nangngeganen ti umalingawngaw a boses dagiti ‘bosses’ a rumbeng ken maitutop a makiraman ken makibiang, maipapan kadagiti isyo, nangruna ti saan a maiparbeng a pannakagastos ti kuarta ti pagilian, dagiti nagpukaw a kasla asuk a pundo a saan a mailawlawag no sadino ti napananda ken asino iti nagpaayanda.

Ti Million People March ti immalingawngaw a boses dagiti ‘bosses’ a nangngegan, a nalawag a sungbat iti “Kayo ang boss ko!” nga insawang ti boss kas apirmasionna a pagibatayan ti kinaadda ti pammakired a mangestablisar iti natalged ken nair-irut a relasion, no di man mangguyugoy, mangawis wenno tapno mapunas ti panaggudeng ken agam-agam ti asinoman.

Ita ta nangngeganen ti boses dagiti ‘bosses’ a kas iti napasamak a Million People March,  naibalud payen ni Reyna Pork Barrel, naibutaktaken ti nagan dagiti nainbolbar itoy, nagimbestigan ti Senado. Kalpasan ti Sa EDSA Tayo, ania kadi ti sumaruno?

Saan koma nga agpatingga laeng ti panagsisinnukat ti boses no di ket pannakaestablisar ti solido ken makapnek a tignay para iti pagsayaatan ti sapasap. Masapul a makita ti sinseridad babaen ti kinaadda  ti pellucidness ken transparency iti kaban ti ili: no sadino ti nagtaudanna ken no mano daytoy, no kasano ti pannakagastona, no asino ti mangusar itoy, ken dadduma pay.

Por ehemplo, intay taldiapan ti maysa a pagtaudan ti pundo ti pagilian, ti Malampaya Fund. Asino ti mangiyimplimentar iti pannakagastona? Babaen kada senador, kada kongresman ken napili a line agencies. Kasano ti pannakagastona, saan a nalawag. Napukaw ti transparency. Nagpatingga kadakuada wenno napan kadagiti bugos nga NGO? Saan a nakadanon iti rumbeng a papananna. Nadadael ti pundo iti saan a nainsiriban a pannakalustayna wenno iti nadakdakes a termino, nainsiriban a pannakaibulsa. Ti binilbilion a pundo (based on the P46 billion income in 2011) ket nagtaud iti bayad ti Caltex ken Shell a kas napusgan a mangibangkag kadagitoy a langis manipud Palawan.

Ipangpangruna koma a denggen ti boses dagiti ‘bosses’ no pudno met laeng a natarnaw ti panggep ti pannakaisawang ti “Kayo ang boss ko!” Tapno magun-odan ti equal distribution of wealth, ikkan iti konsiderasion ken ipasa ti FOI bill tapno maaddaan  iti nalawag a paganninawan iti pannagna iti kuarta ti pagilian. (JMA, Jr,)