EDITORIAL: Ti DepEd iti Tuwid na Daan

Kamaudiananna, nagbunga met laeng ti panagan-anus dagiti substitute teachers, nangruna dagiti nabayagen nga agan-anus nga agur-uray iti bakante nga item. Maaddaandan iti gundaway a maiyalis iti as-asideg a pagisuruanda, no di man iti mismo a barangayda ta iti daytoy nga school year, nagnayon ti DepEd kadagiti titsers.

Nasken laeng nga aramiden ti DepEd daytoy tapno malitupan ti panagkurkurang dagiti mangisuro, nangruna iti tinawen a panagpangato ti enrolment. Iti pannakaiyempleo ti ad-adu pay a bilang dagiti mangisursuro, makissayan ti problema ti ratio ti maestra ken adalan, ken maliklikan ti panaglilinnetletda iti nakipet a kuarto nga agkurang pay iti pagtugawanda. Iti daytoy a situasion, ania ti namnamaen a kalidad ti edukasion a sagrapen dagiti ubbing?

Agdagup iti 55,848 ti bilang dagiti nainayon a titser iti daytoy nga school year a mangsulnit iti kasapaulan a 61,510 a puesto wenno  iti kadagupan a 90.79 a porsiento.  Dakkel a bilang iti employment daytoy, lalo ket permanente wenno addaan iti seguridad dagiti naipuesto a mangisursuro,  saan laeng nga iti panawen a panagtrabahoda no di pay uray iti panagretiroda.

Dakkel a bilang ti narekrut. Panagdur-as ti edukasion ti nalawag ken manamnama nga ibunga ti addang; maksayan iti agsobsobra nga oras ti panagisuro, maksayan ti bilang dagiti estudiante iti maysa a siled, lumawa met ti aangsan dagiti nagannak.

Kas katukadna, manamnama met ti pannakaipaay ti de-kalidad nga edukasion. Nalawa ngamin ti giwang ti estado ti panagbiag dagiti addaan iti nalabon a pribilehio kontra kadagiti makurkurangan. Nasken a maitaguyod ti panagpapatas ti amin, ket magun-od laeng daytoy babaen ti pannakapetpet ti natalged nga edukasion a kas pagbatayan ti asinoman a tumuntong iti narimrimat ken nadurdur-as a masakbayan. Maiyawat koma dayta a pribilehio iti asinoman. Rumbeng laeng a mamantenir ti pampubliko nga edukasion ti kinasalun-atna tapno maragpat ti ingpen ken rason ti panagpursige a panangidur-as itoy.

Nasken met nga igiddan ti pannakapataud kadagiti ad-adu pay a pasdek-eskuelaan agraman pasilidad ken nesesidad a rumbeng nga iburay; nasken a supisiente ti kasapulan a teksbuk ken dadduma pay a learning and teaching materials.

Kadagitoy nga addang a panangidur-as iti edukasion, kaiyariganna met ti panangtalunton iti Tuwid na Daan.#