Footer

EDITORIAL: Ti dua nga imahe ni Manny Pacquiao

Itay nabiit, pormal a nagsapata iti sanguanan ni Senador Aquilino “Koko” Pimentel III ni nalatak a boksingero ken agdama a Sarangani Congressman Manny Pacquiao a kameng iti partido ni Vice President Jejomar Binay a Partido Demokratikong Pilipino-Lakas ng Bayan (PDP-Laban).

Isunto ti ibayog ti partido a kumandidato para gobernador ti Sarangani iti eleksion inton 2013.

Iti daytoy a panagsapatana kas kameng iti sabali manen a partido limtuad ti dua nga imahe ni Pacquiao. Maysa a tao nga id-idoluen dagiti tattao kas boksingero ngem maysa met a politiko nga awan ti loyalidadna iti partido a nakikappenganna.

Awan pay tallo a tawen sipud idi nagtugaw a kas diputado ti Sarangani, nagluposen a naminpinsan ni Pacquiao. Nagbalinen a napeklan a tradisional a politiko iti panagsukatsukat ti partidona. Maysa a balimbing a mapagduaduaan ti kinapudnona iti partido a nakaikappenganna.

Kitaentayo ti napalabasna kas politiko:

Idi 2007 a panagsangoda ken ni incumbent Gen. Santos  City Congresswoman Darlene Antonino-Custodio, nagkandidato ni Pacquiao iti babaen ti Liberal Party ni dati a Mayor ti Manila Lito. Ngem insualit ni Cong. Antonino-Custodio.

Idi 2008, kimmappon iti Kampi ni Presidente (idi) Gloria Macapagal-Arroyo.

Idi 2009, nangbuangay iti bukodna a partido, ti People’s Champ Movement.

Idi 2010, kimmappeng iti Nacionality Party ni dati a Senador Manuel Villar a nagtaray iti kinapresidente kontra ni Senador Bengino Aquino.

Idi nangabak ni Aquino, dagus a napan nag-courtesy call ni Pacquio ket impalagidna ti tarigagayna nga agbalin a kameng ti LP ni Pres. Aquino.

Sa ita, timmayab manen iti PDP-Laban.

Iti sabali a bangir, ibambandona ti bagina a kas “baro a kappasngay” manipud iti bisio, sugal, arak a nakaigameranna iti kallabes. Ibambandona ti bagina a nakakita iti “baro a lawag” ket agiggem payen iti Biblia a katulonganna a mangpalawag kadagiti nasipngetan a pampanunot dagiti kailianna.

Adu dagiti agraem ken ni Pacquiao kas maysa kadagiti kalalakian a boksingero iti sangalubongan. Mabalin a saanton a makasarak ti sangalubongan iti maysa a boksingero a nagkampeon iti walo a dibision.

Ngem iti sabali a bangir, kas politiko? Ah, adu dagiti pagkamtudanna, isu ti maysa kadagiti kaaduan iti langan iti House of Representives ken  saan a maibilang a pagwadan a politiko ti imahe nga ikutna, nangruna ti agparparang a kinaawan ti loyalidadna iti pakaikappenganna a partido.#