EDITORIAL: Ti istratehia ni Davao Mayor Rodrigo Duterte

Apaman nga imbabawi ni Mayor Rodrigo Duterte ti panagpailayonna para mayor iti Davao City sana impila ti sertipiko ti kandidaturana para Presidente, maysa a Ruben Castor ti dagus a nangkuestionar iti panang-substitute ni Duterte ken ni Martin Diño nga immuna a nagipila iti kandidaturana (kuno) kas standard bearer ti Partido ng Demokratikong Pilipino-Laban (PDP-Laban).

Iti impilana a COC, inlanad ni Duterte nga innominar ti PDP-Laban a kandidato para iti kinapresidente, kasukat ni Diño.

Yan ti imasna (wenno paitna), saan met a para presidente ti nailanad iti impila ni Diño a COC no di para mayor ket daytoy ti kuinestionaran ni Castor iti Commission on Elections.

Iti petisionna, kinuna ni Castor a saan a mabalin a substitutan ni Duterte ni Diño a para presidente agsipud ta iti impila ti naud-udi a COC, para mayor ti pagkandidatuanna, saan a para presidente.

Ngarud, null and void ti kandidatura ni Duterte, segun iti petision ni Castor iti poll body.

Kinapudnona, adu ti mangbabalaw ken ni Duterte no apay a nagpakpakutibeng iti panangisaruagna iti kallugongna para iti bakal iti kinapresidente. Ngamin, iti kallabes, sangkakunana a saan nga agkandidato a para presidente iti baet iti panaginteres ti sumagmamano a kandidato para bise presidente nga isu ti makatiketda. Idi impilana ti kandidaturana, para mayor ketdi iti Davao City ti nagsaltekanna.

Ngem segun iti sumagmamano a political analyst, istratehia laeng ni Duterte dagitoy tapno mapagsasaritaan, tapno maawisna ti imatang dagiti umili, nangruna dagiti botante. Ngamin, awanen ti ammo ti publiko ken ni Duterte malaksid a maysa a no-nonsene mayor iti Davao City. Nalatak laeng a mayor a kabutbuteng dagiti kriminal ken managdakdakes gapu iti mapapati a panangipatangadna iti barsanga dagiti dakes nga elemento a nangpadas nga umadak iti teritoriona.

Ngem ita, segun iti maysa a surbey, iti Metro Manila, ni Duterte ti numero uno a kandidato para presidente.

Padaanantayo ngarud no ania ti pagbanagan ti petision ni Castor.
Ngem ammo la ketdi ni Duterte a pangrugian la dagitoy tapno mabalangan ti kandidaturana.

Saan nga asi-asi a politiko ni Duterte, naisaganana la ketdin ti bagina a mangsango amin dagiti maibato kenkuana a nangisit a pitak tapno madadael ti imahena kadagiti botante.#