EDITORIAL: Ti nakaay-ay-ay a kasasaad ti sports iti pagiliantayo

ITI BAET ti nangato nga ekspektasion dagiti dadaulo iti isports iti pagilian nga agubon iti medalia dagiti atletatayo iti Asian Games, kas kaeppes dagiti kapagayantayo a binasnot ni Bagyo Mario ti total a medalia a nagun-odda iti daytoy a paay-ayam.

Iti pannakaisurat daytoy, adda metten nagun-od ti pagilian a bugbugtong a gold medal, maysa a silver medal, ken sumagmamano a bronze medals.

Ngem kangrunaan unay a nakaupayan dagiti kakailian ti basketball. Maikapito laeng a puesto ti nagun-od dagiti basketbolistatayo iti Asian Games. Napait nga annugoten ngem inlugesluges dagiti bumabasketbol iti sabsabali a pagilian ti Pilipinas, ti kakaisuna a pagilian iti Asia nga addaan iti propesional a liga ti basketbol.

Kangrunaan unay ti basketbol a ninamnama dagiti dadaulo iti sports iti pagilian a mangiyawid iti medalia iti Asian Games. No patien dagiti writeups, maibilang ti nasao a team a maysa kadagiti kapigsaan a team nga ibaontayo iti Asian Games.

Maipalagip daydi panawen a nagkampeon ti basketball team ti Pilipinas iti Jones Cup. Kaadduanna a Fil-Am dagiti nangbukel iti nasao a team a sinanay ken sinukog ni Michael Keon nga agbalin a napigsa a team. Daytoy a team ti nangted iti pammadayaw iti pagilian gapu iti panangdalebna kadagiti naglalaing a basketball teams iti ballasiw-taaw. Ngem adayon a kalman a napasamak daytoy.

Iti pannakisalip ti basketball team ti pagilian iti FIBA, nakita dagiti kakailian ti determinasionda a mangabak agingga iti maudi a minutos, isuna laeng ta kaarigda ti agtartaray a kabalio a kellaat a naangsan ken nadalupo.

Ngem dakkel ti namnama dagiti sports leaderstayo a mangiyawidda iti medalia, no di man ti gold medal iti Asian Games, agsipud ta nababbaba ti tukad daytoy a kompetision ngem iti FIBA. Ngem agtagtagainep la gayam dagiti sports leaderstayo. Kayarigan ti basketball team ti pagilian iti napuyotan a balloon a bimsog sa kellaat a nabtak gapu ta dina nabaelan ti puersa ti angin a nangpabussog kenkuana.

Saantayon a dakamaten ditoy ti nakas-ang a sinagrapda iti ima dagiti basketbolista a maibilang a pipitsugin gapu ta saanda pay unay a nabayag a nabukel a basketball team.

Ngem napait man nga annugoten, saan a kabaelan dagiti basketbolistatayo, uray kasano ti kinalaingda, ti makirupak kadagiti ingget tayag a basketbolista dagiti sabsabali a pagilian. Ay-ayam para kadagiti natatayag ti basketbol.

No adda man dakkel ti tsansa a mangiyawidtayo iti balitok a medalia iti man Asian Games wenno iti Olympic Games ket babaen iti boksing, taekwondo, wenno archery.

Dagitoy koma ti ad-adda a pangipaayan dagiti dadaulo iti sports iti naan-anay nga imatang.

Saan koma nga agtitinnudo dagiti dadaulo iti sports a pangidas-alanda iti pammabasol. Ti ket aramidenda koma, agsublida iti drawing board tapno baliwanda a kitaen no sadino ti pagkapsutan ti sports iti pagilian.

Ken saan nga agpatingga laeng koma iti Palarong Pambansa ti panagbirok kadagiti atleta nga adda kabaelanna. Kasapulan iti makunkuna a pool dagiti atleta, daytay kasla sarusar a pagtaudan dagiti masansanay nga ubbing ken makabael nga atleta a nakasaganan a maipasungalngal iti internasional a kumpetision. Kasapulan pay ti naan-anay a panag-training, disiplina, naan-anay a pasilidad, ken exposure kadagiti internasional a competition.

Mait-ited kadi dagitoy kadagiti atletatayo?#