EDITORIAL: Ti Nalinteg a Dana iti Kongreso Nasional iti Lengguahe

Masurotan koma ti nagkaykaysa a nakem ti nalinteg a dana, maaddaan rangtay dagiti saan a panagkikinnaawatan gapu laeng iti saan a panagsasabat dagiti ingpen ken interes; maipasuli koma ti pinnangatoan iti timid ken pinnadakkelan iti nagan tapno masurot ti umno nga arungaing nga isu dayta ti napudpudno a sangkapagilian a panagkaykaysa. Masurotan koma ti maitutop a nagkaykaysa nga aramiden kalpasan ti Kongreso Nasional iti Lengguahe a maangay inton petsa 19-21 iti daytoy a bulan sadiay Ateneo de Manila University (ADMU). Daytoy ti kaunaan a kombension nasional iti lengguahe iti sirok ti payong ti nalinteg a dana a sapasap a programa ti gobierno.

Ni Presidente Benigno Simeon Aquino III ti manglukat ken mangipaay iti mensahe ken paratignay iti taripnong dagiti mannursuro, dagiti iskolar, dagiti mannurat, ken dadduma pay nga institusion publiko ken pribado tapno pagsasaritaanda, pagkaykaysaanda nga idatag dagiti nakananama a solusion kadagiti parikut iti lengguahe, lalona kadagiti power domains iti panangpadur-as ti Filipino ken dadduma a lengguahe ken dayalekto iti pagilian. Ti Komisyon sa Wikang Filipino ti mangitaguyod iti panggep a bayabayen ti DepEd, DILG, CSC, CHED iti pannakitinnulong ti Ateneo de Manila University. 

Iti sangkapagilian a komperensia a panagurnong iti balikas, ti Ambagan: Pambansang Kumperensiya sa Paglikom ng mga Salita mula sa Iba’t ibang Wika sa Filipinas, a napasamak iti met laeng ADMU, nakita ti posible a sungbat ti maysa a parikut no kasano a padur-asen ti Filipino a kas nailian a lengguahe a saan a mapanawan, saan a malipatan, saan nga idisso dagiti dadduma pay  a dila; ita tawen, ti Asi, Tagalog-Lucban, Ilokano, Ibaloi,  Tsino, Tausug, Cuyunon, Higaonon, Tagalog-Mindoro, Kapampangan, Pangasinan ti nagadawan. Ti panagurnong  kadagiti balikas ken panangitipon iti Filipino ket panangidur-as iti daytoy.

  Ad-adu koma pay no di pay ket isu koma amin a lengguahe ken dayalekto iti pagilian ti pagtaudan dagiti itipon a balbalikas iti Filipino babaen kadagiti progresibo a programa, ta rumbeng la unay a parangpayaen ken ibunannag iti sapasap ti bukod a dila.

Ti panangipaay respeto kadagiti amin a dila iti pagilian ket nainkappiaan a panangtalunton iti nalinteg a dana.#