Limtuaden ti narugit a rupa ti politika ditoy pagilian iti yaasideg ti eleksion inton Mayo 10, 2010.
Magna itan ti kinnaradapan, pinniltakan iti pitak ken buyok ken panagtraidor ken panagballasiw iti partido dagiti sumagmamano a politiko aglalo no madlawdan a lumned a barko ti partidoda wenno mairamanda a malmes iti ngumatngato a rating ti kandidato a kasupanget ti kandidatoda.
Itay nabiit, naglusulos ni presidential candidate Gilbert Teodoro kas chairman ti partido Lakas-Kampi-NUCD tapno maipamaysana kano ti panagkandidatona. Ngem ad-adda a nakapapati nga inaramidna dayta agsipud iti kapaliiwanna a saan a panaggaraw ti administrasion tapno maibayog ti kandidaturana iti sanguanan dagiti surbey nga adayo ti pakaarusanna kadagiti sabali a kandidato para kinapresidente.
Nupay adda dagiti pronouncements ti Malakaniang a ni “Gibo” ti suportaranda, mapaliiw a saan nga agkuti ti makinaria ken pondo ti administrasion tapno maitag-ay ti opisial a kandidatona iti kangatuan a posision iti pagilian.
Dandani pay nagsanud ni Edu Manzano a katiket ni Teodoro gapu iti alegasion nga awan ti pannuporta ti administrasion a pondo para iti panagkampaniana.Imbabawi met laeng ni Manzano ti ballaagna ngem dakkel ti epekto daytoy iti kandidaturana. Agingga ita, adayo ti puesto ni Manzano kadagiti naisayangkat a surbey.
Di pay nabayag, pimmanaw da dati a Gov. Luis “Chavit” Singson, Compostela Governor Arturo Uy, Cebu Representative Nerissa Soon-Ruiza, Bukidnon Governor Jose Ma. Zaburi ken Cebu mayoralty candidate Alvin Garcia iti partido ket inwaragawagda iti panangsuportada ken ni Sen. Manny Villar a para presidente.
Iti sabali a bangir, napan iti LP da Albay Governor ken presidential economic adviser Jose Salceda, Mandaluyong City Representative Neptali Gonzales II, Quezon City Mayor Feliciano Belmonte Jr., dati a Socio-Economic Planning Secretary Ralph Recto, Misamis Occidental Governor Loreto Ocampos ken Caloocan City Mayor Enrico Echiverri.
Ibalballaag metten ni House Speaker Prospero Nograles iti ipapanawna iti Lakas-Kampi-CMD gapu iti kunana a di mapakpakaammuan kadagiti mapaspasamak iti partido, banag a saan a nakapapati.
Imballaag met ti Malakaniang a sanutanna dagiti nagballasiw ngem kapaliiwan a di maitaltalek daytoy. Banag nga ad-adda a mangpatibker iti suspetsa dagiti kritikona nga adda nalimed a tulaganda ken ni Villar.
Sangkapetteng dagiti kritiko ti Presidente a ni Villar ti nalimed a kandidatona para presidente kas paset ti mapapati a plano a pannakaibayogna a kas House Speaker no mangabak daytoy iti eleksion.
Kadagiti sumarsaruno nga aldaw, masaksiantayo pay ti panaglusulos, panagballasiw ken panangtallikud dagiti lokal a kandidato iti partidoda. Political alignment, kuna dagiti agpalpaliiw.
Iti biangmi, awaganmi dagitoy a politiko iti balimbing, awanan loyalidad iti partidoda, ngarud saan a rumbeng a pagtalkan iti turay ken bileg.#
