EDITORIAL: Ti Nasiken A Relasion Pamilia, Sarikedked Kontra Droga

Ti nasiken a relasion kadagiti amin a kameng ti pamilia ti kasamayan pay laeng a makitami a pangontra iti droga, aglalo kadagiti naganus pay laeng ti panunotna nga agtutubo ken naayat iti nagduduma nga adbentura ken eksperiensa. Babaen ti nasiken a relasion, mamonitor a nasayaat dagiti nagannak dagiti annakda, lalo kadagiti naisabsabali nga ugali, tabas, panagsasao, tigtignay ken no asino dagiti kapulpulapolna. Ta kas itay kunadan, no ania ti kakuykuyogmo, maibaga met ti kinaasinom.

Ngem kasanon dagiti annak nga awanan iti pannarabay kadagiti nagannak kadakuada? Dagiti annak dagiti OFWs, dagiti adda iti adayo a lugar a pagtrabahuan, ken dagiti addaan nagannak a nagsina? Ti guardians ti kangrunaan a manarabay kadakuada. Nasken nga ipasagepsep kadagiti agtutubo nga awan ti maitedna a pagsayaatan ti panagusar iti droga, a nasayaat no liklikanda dagiti agar-aramaten itoy. Iti droga, madadael ti masakbayanda. Agkupas dagiti timmanor nga arapaap ket dinton maisubli.

Dagiti agtutubo ti kangrunaan a target ti sindikato nga aglaklako iti marihuana ken shabu. Babaen ti sulsol dagiti gagayyem, adda ‘tay kunadan, ramanan tapno ammo ti pakasarsaritaan. Ngem ti maminsan, masunotan, agingga a nailuodton iti daytoy a bisio. Ti rigatna, mapukaw ti essem a mangsirmata ti masakbayan, ta ad-addan nga inukopar ti panunot no kasano a sustentoan ti bisio.

Ad-adda pay a rimmikut ti kasasaad ti gimong iti agdama  ta natakuatan ti Philippine Drug Enforcement Agency (PDEA) a nakadanonen iti pagilian ti notorious a sindikato, ti Mexican Sinaloa drug cartel. Saan a nasayaat a seniales daytoy. Kuarta ti ar-aramaten daytoy a sindikato a pangabbong ti mata ken ngiwat dagiti otoridad tapno awan ti makitada, awan ti mangngegda, ken awan ti ammoda iti mapaspasamak. Ti rigatna, saan laeng a dagiti otoridad ti kabaelan a sulsolan ti sindikato no di uray pay dagiti government officials, kas iti mapaspasamak kadagiti nasion a pagpaypayagpagan ti puersada nangruna dagiti pagilian ti Mexico, Columbia wenno dagiti pagilian iti Western hemisphere.

Iti iseserrek ti Mexican drug cartel, pudno la unay a dakkel ti sangsanguen a responsibilidad iti pannakibakal itoy a sakit ti gimong. Nasken ti panagsiput. Abrasaen dagiti annak sakbay nga aramiden ti sabali. Ti nasiken a relasion ti pamilia ket pudno la unay a nasamay a sarikedked a pangkontra iti droga. (JMAgpalo, Jr.)