EDITORIAL: Ti Passion ni Hesukristo

Nangrugi ti pannakapaliiw iti Semana Santa itay Domingo Paskua, aldaw a naballigi nga iseserrek ni Apo Hesuskristo iti Herusalem, dua ribu a siglon ti napalabas. Iti daytoy nga aldaw, aglaplapusanan ti bara ti pannakasarabo ni Hesus a nakasakay iti asno ken dagiti disipulosna idinto nga indirdir-i dagiti umili iti naganna. Kayarigan ni Hesus ti mannakigubat a simrek iti pagilian kalpasan a pinarmek dagiti buyotna dagiti kabusorna. Kayariganna ti didiosen a tinangtangad ken nagtamdan dagiti tattao.

Ngem nagamak dagiti nangato a padi ken pariseo a no itulokda ti ar-aramiden ni Hesus, mamatinto amin dagiti tattao kadagiti pannursurona, ket dumteng ti panawen a sumrek dagiti Romano ket rebbaenda ti sibubukel a siudadda.

Kinuna ni Caiphas, maysa kadagiti nangato a padi iti dayta a tawen: “Nasaysayaat a matay ti maysa a tao para kadagiti tattao ngem ti madadael ti sibubukel a siudad!”

Idi naidatag ni Hesus ken ni Herodes, sinaludsod ti gobernador: Sika kadi nga agpayso ti ari dagiti Hudeo?” Insungbat ni Hesus: “Sika met la ti nagkuna iti dayta.”

Kas nakaugalian iti Paskua, mangwayawaya ni Herodes iti maysa a balud. Pinagpili ti gobernador dagiti tattao no asino ti mawayawayaan: ni Hesus a Nasareno wenno ni Barabbas, maysa a balud. Ngem babaen ti durog dagiti nangato a padi, impukkaw dagiti tattao a mawayawayaan ni Barabbas ken mailansa iti krus ni Hesus. Nagpaala ngarud ni Herodes iti danum, binugguanna dagiti imana kas panangibatadna nga inosente iti dara ni Hesus sana inkeddeng a mailansa ni Hesus iti krus.

Manipud iti palasio, naipabaklay ti nadagsen a krus nga awiten ni Hesus, rinabsutda ti pagan-anayna, sada kinoronaan iti siit. Iti dalanna nga agturong iti Golgotha, naglak-am ni Hesus kadagiti saplit ket sumagmamano a daras a naidaramudom gapu iti kadagsen ti baklayna a krus. Siulimek a nagbuya dagiti tattao idinto nga umarubos dagiti lua dagiti babbai a pakaibilangan ni Santa Maria nga ina ni Hesus.

Iti Golgotha, nailansa iti krus ni Hesus iti nagbaetan ti dua a mannanakaw.

Maysa kadakuada, ni Dimas, maysa a mannanakaw ti dimmawat iti pammakawan gapu kadagiti naaramidna a babak. Kinuna ni Hesus: Manipud iti daytoy nga aldaw, makipaggianka kaniak iti pagarian ti Amak.

Bayat ti panagrigat ni Hesus, nakitana ti agsangsangit nga inana iti ummong dagiti naliday a babbai.

Kinunana: Babai, ayatem ti anakmo kas iti panagayatko kenka. Anak, ayatem ti inam iti nasursurok pay ngem panagayatmo iti bagim.

Idi inyebkasna a mawaw, maysa a soldado ti nangited iti tabo a naglaon iti suka. Nagbibingayan dagiti soldado ti pagan-anayna sada pinagsusugalan.

Idi agkapsuten, inyebkas ti Anak: Ama, apay a binaybay-annak?

Iti dayta met la a darikmat, kellaat a nanglangeb ti tangatang ket nayurit ti nagsasanga a kimat. Napisang ti kurtina ti santuario idinto a dinayyeg ti ginggined ti aglawlaw.

Nakuna ti maysa a soldado a nakaimatang kadagiti pasamak: Anak nga agpayso ti Dios daytoy!

Daytoy ti passion ni Hesus a palpaliiwen ti sibubukel a Kristianismo iti tinawen. Pakasaritaan ti maysa nga Anak a naibaon ditoy Daga tapno subbotenna ti basol ti tao. Awanen ti dakdakkel pay a panagayat ti panangibaon ti maysa nga Ama iti Anak tapno agrigat iti Daga gapu iti kinarasi ken kinalupoy ti Tao. Awanen ti dakdakkel pay a panangipateg ti panangibaklay ti Anak iti nadagsen a krus tapno masubbot ti basol ti tao.

Iti daytoy a lawas, intayo ngarud amirisen ti bagitayo: maikaritayo kadi iti panangibaklay ni Hesus iti nadagsen a krus ti basbasoltayo?