EDITORIAL: Ti Piesta Ni Sto. Niño

Tunggal maikatlo a Domingo ti Enero a selebraran ti piesta ni Sto. Niño; ita a tawen, agtinnag iti Enero 20. Saan laeng a ti pagilian ti mangselebrar kadaytoy a piesta no di pay ti sibubukel a sangalubongan nga ayan dagiti Kristiano babaen ti pammilin ti The Holy See a kas pammatibker ken panagpabaro ti pammati.

Dakkel la unay ti kaipapanan ni Sto. Niño iti biag ni Pilipino. Ti debosion ket kagiddan ti pannakaisaknap ti kristianismo iti pagilian.  Namunganay daytoy idi inakseptar ni Reyna Juana nga asawa ni Rajah Humabon ti Cebu ti imahe manipud ken ni Ferdinand Magellan idi 1521 kas sagut ti kongkistador iti panangpasangbayda kenkuana—sagut a kas simbolo ti panaggayyem nga isu metten ti nangrugian ti ebanghelisasion.

Isu a saan a nakakaskasdaaw no adu nga ili ken siudad ti makinpatron ken ni Sto. Niño wenno ti imahe ni Apo Jesus idi ubing wenno maladaga pay laeng; isu a no dadduma, awaganda daytoy a piesta nga ekstension ti selebrasion ti pannakaipasngayna a sinelebraran laeng itay Paskua. Saan laengen a panangipasimudaag iti pammati iti Dios ti bugas ti selebrasion no di ket nalaokan payen iti panangpreserba ti nariingan

Apaman a sumagpat ti baro a tawen, mangrugin dagitoy nagduduma a piesta ni Sto. Niño  iti nagduduma a petsa agingga iti umuna a lawas ti Pebrero.

Adu nga ili ken  siudad dagiti makinpatron ken Sto Niño. Malaksid iti Luzon, iti Kabisayaan laengen ket addaan iti sangadosena a religious ken cultural festivals a mangidaydayaw ken Sto. Sto Niño.

Itoy a panangrambak ti Piesta ni Sto. Niño, sumiken ti relasion tunggal maysa;  maitaguyod ken mapreserba dagiti kostumbre ken kannawidan a pakaadawan dagiti napateg a tagipatgen ken kinaasino ken pannakapabaknang dagiti aw-awid a kultural ken religious heritage.

Ngem liklikan koma nga agpokus ken agsentro tunggal parambak a mangitag-ay iti pagesman ti bagi, dagiti nagduduma a ragragsak a rugi ti pannakalipat wenno panangipasuli iti pudpudno a kaipapanan ti ramrambakan. Ad-adda koma a nakasentro dagitoy a parambak a kas religious feasts, yantangay isu met dayta ti kangrunaan a rason ti selebrasion.

Ad-adda koma a lumtaw ken itaguyod dagiti tagipatgen a panagpakumbaba ken panagtallugod iti nakem ti Dios; panangpabaro ti pammati ken panagubing manen tapno magun-odan ti awanan mulitna nga ayat; ta kasapulan a pabaruen ken paubingen ti kinatao tapno mailaksid kadagiti nainlubongan a pagesman; ta dagiti laeng ubbing ti naiyadayo iti panagbasol—dagiti ubbing a napakumbaba ken managtungpal.

Daytoy piesta ni Sto. Niño ti kaipapanan ken representasion ti panagubing ni Apo Jesus ket patien ti sangalubongan a Kristianismo a miracle worker daytoy nga imahe.#