EDITORIAL: Ti politiko, kas tagilako

Tapno agballigi ti maysa a negosio, kasapulan a nasayaat ti klase ken pannakaipakete dagiti tagilakona tapno maawis ti imatang dagiti gumatang.

Dayta ti kangrunaan a makagapu no apay nga aggasto dagiti dadakkel a kompania iti dakkel, iti man radio, warnakan ken telebision, tapno maipromotda dagiti produktoda wenno tagilakoda kadagiti aggatang a konsumer.

Iti maysa a surbey a naisayangkat itay nabiit, naduktalan a ti radio, telebision ken warnakan ti kangrunaan a pagtaudan ti pannakaammo dagiti umili maipapan iti maysa a kandidato.

Pammaneknek daytoy ti resulta dagiti surbey a dagiti kandidato para senador nga addaan nalatak a nagan ken apeliedo dagiti adda iti nangato a puesto wenno ranking kadagiti manamnama nga ibutos dagiti napagsaludsodan a botante. Name recall a kunada. Dakkel ti maitulong dagiti mangngeg, mabuybuya ken mabasbasada iti radio, telebision ken pagiwarnak iti pannakapaadda ti awareness dagiti botante kadagiti paidasig a kandidato.

Maiyarig met ti politika iti negosio ket maibilang a tagilako wenno maysa a produkto dagiti politiko. Dayta ti gapuna a tunggal eleksion,  saan nga agpangadua dagiti politiko a mangilatang iti dakkel a pondo para kadagiti anunsio iti radio, tv wenno warnakan.

Kas tagilako tapno  maliwliwna dagiti gumatang wenno botante, aglasat dagiti kandidato iti nadumaduma a proseso tapno mailemmeng dagiti pagkamtudan wenno pakaarusanna kadagiti sabali a kandidato ket maiyunay-unay dagiti pagpigsaanna iti imatang ti publiko.

Ngarud, no eleksion, saan a nakakaskasdaaw a mangegtayo a maiyapiring iti maysa a kandidato ti ‚Äúnaretoke a ladawanna‚ÄĚ a mangibambando kadagiti napintas a galad ken sagudayna kas mangituray ken ‚Äúadipen dagiti umili‚ÄĚ.

No palausen ti manarita, agbalin dagitoy a politiko a¬† ‚Äúsanggir dagiti umili‚ÄĚ, ‚Äúnamnama ti kaadduan,‚ÄĚ ‚Äúnasaririt, natakneng,‚ÄĚ ‚Äúmapagtalkan a mangidaulo,‚ÄĚ ket isuda laeng ti ‚Äúrumbeng a mangituray‚ÄĚ tapno agdur-as metten ti ilida wenno probinsiada a nabayagen a nabaybay-an gapu iti kinamanagbaybay-a ti napalabas a nagturay.

Dimi naaluadan ti nagkatawa idi nangegmi iti radio ti jingle ti sumagmamano a kandidato a nagkuna a ‚Äúpusona nabalitokan,‚Ä̬† ‚Äúlider a kasiglatan,‚ÄĚ idanonna ti ‚Äúnadungngo a panagserbi‚ÄĚ ken ‚Äúkasapulan ti probinsia‚ÄĚ.

Ngem iti biangmi, saanen a nengneng dagiti botante. Ammodan ti naguneg dagiti kandidato a paidasig kadakuada. Ammodan ti inalat dagiti kandidato a paibutos manen. Ammodan a dagitoy dagiti agtuturay a sa laeng ammoda ti umasideg kadagiti umili no tiempo ti eleksion.

Wen, uray makalupkopan man iti nabursi ken narangrang nga aruat ti maysa a tagilako, dinton gatangen dagiti umili kalpasan ti pannakapadasda a nalimlimuanda iti napalabas.  Kasta met ti maysa a politiko. Mabalin a maallilawna dagiti botante iti naminsan wenno namindua ngem saan nga amin a panawen. Dumtengto ti panawen a maamiris dagiti umili a saan gayam a maikari ti politiko nga ipuestoda iti turay.#