Footer

EDITORIAL: Ti saan a malapdan a panagpanaw dagiti propesional ken skilled workers iti pagilian

Iti napalabas, nagsagrap dagiti nadumaduma nga ospital ditoy pagilian iti kinakirang dagiti doktor ken narses gapu iti panagpanawda a mapan mangged iti sabali a nasion.

Kasta met a maitudo a maysa a bimmabaan ti kalidad ti edukasion ditoy pagilian ti panagpanaw dagiti nalalaing a mangisursuro agsipud iti napigsa nga awis ti nangato a sueldo nga itanggaya dagiti sabali a pagilian.

Itay nabiit, nagsagrap ti Pag-asa iti pammabalaw gapu iti saan a madagdagus a panangipakdaarna ti panagbaliw ti direksion ti bagyo a nagtungpal iti  pannakatay ti sumagmamano a biag. Inkalintegan dagiti opisial ti Pag-asa a malaksid ti daan nga instrumentoda, nagpapanaw dagiti makabael a meteorologists gapu iti kinababa ti sueldoda.

Ket itay napan a lawas, nagsagrap ti Philippine Air Lines iti nakaro a pukaw gapu iti pannakakansela dagiti biahena gapuen iti panaglusulos dagiti piloto. Maysa a rason ti kinababa ti sueldoda.

Dagiti insidente iti ngato ti makapaneknek ti saan a malapdan a panagpapanaw dagiti propesional ditoy pagilian a pakaibilangan dagiti inhiniero, doktor, nars, sientista, IT specialists, accountants dagiti mangisursuro ken dagiti dadduma pay nga skilled workers tapno mapanda mangged iti sabali a pagilian a pakariknaan iti kinakirang dagiti mangsulnit kadagiti pagannongan a pinanawanda.

Inladawan pay ti maysa nga opisial ti Employers’ Confederation of the Philippines nga “agpadpadara” ti pagilian gapu iti pannakapukaw iti “highly professional ken skilled”  a manpower ditoy pagilian.

Adda agdagup iti 9 milion a kailiantayo nga agtrabtrabaho iti ballasiw-taaw ket saan a mailibak a dakkel ti maipawpaw-itda a remittances. Idi napan a tawen, nakaipatulodda iti $17.3 bilion kadagiti pamilia ken kabagianda  ditoy pagilian a dakkel a mangsarsarakuy iti ekonomia ti pagilian.

Ngem anian ta dakkel ti supapak iti daytoy a panagpanawda a mapan mangged iti sabali a pagilian: sakripisio, pannakaila iti pamilia, panagsagaba iti diskriminasion, pannakamaltrato, pannakaabuso iti kalintegan ken dadduma pay a masapul nga ibturanda tapno laeng maitedda ti naranraniag a masakbayan iti pamiliada.

Ngem saan a malapdan ti panagpanaw dagitoy a kailiantayo agsipud ta makita nga awan ti natalged a rason a pamkuatanda nga agbati ditoy pagilian kas iti nangatngato a sueldo a maikumpara kadagiti padada a mangmangged iti sabali a pagilian, dakdakkel a benepisio a sagrapendanto kalpasan ti panagretiroda iti trabahoda ken dadduma pay a taringgawid tapno saanda a mapanunot ti pumanaw iti trabahoda.

Kuna tay pagsasao: ti tao a mapnek iti kasasaadna iti biag, uray kasano dagiti ublag, dinanto panawan ti taengna.

Daytoy ti dakkel a karit iti agdama nga administrasion nga ipaayan iti naan-anay nga atension para ti pannakaitandudo iti nangatngato ti kalidad a panagbiag dagiti umili ditoy pagilian.#